Sustapen Ministerioaren lanak Euskal Herrian

Errepideak bertako erakundeen eskuduntza izanda, trenbideetan, portuetan eta aireportuetan ari da egiten Espainiako Sustapen Ministerioa lan nagusiak Hego Euskal Herrian. Hauek dira haren obra nagusiak, eta haien egoera.

Abiadura handiko trena. Martxan ditu abiadura handiko trenaren lanak Araban, Bizkaian eta Gipuzkoan. Nafarroan, berriki sinatu du akordio bat Nafarroako Gobernuarekin Castejon eta Iruñea arteko lanak hasteko. Obren finantzazioa bermatzeko Hego Euskal Herriko bi gobernuekin hitzarmenak eginda dauzka Sustapen Ministerioak. Hitzarmenen arabera, Euskal Y-aren gastuak banatu ditu Jaurlaritzarekin: Araba, Bizkai eta Gipuzkoako zati bateko lanak Sustapen Ministerioak ordainduko ditu, Adifen bidez. Eta Ezkio-Itsaso eta Irun arteko lanak Jaurlaritzak. Ondoren, kupo bidez itzuliko lioke dirua Espainiako Gobernuak. Nafarroako Gobernuaren kasuan, antzeko eskema da: Castejon eta Iruñea arteko zatiaren 700 milioietatik 400 Nafarroako Gobernuak jarriko ditu, eta gainerakoak Madrilek. Martxan duen lanik garestiena da: guztira 8.000 milioi euro inguruko kostua izan dezakete Euskal Y-ak eta Nafarroako korridoreak.

Loiuko aireportua. 191 milioi euroko inbertsioa du aurreikusia Loiuko aireportua handitzeko lanetan. Obrak martxan daude dagoeneko, eta hasiera batean 2012an amaitzeko helburua dute. Obraren bidez, aparkaleku berria eta terminal berria egiten ari dira, sarrera-irteerak egokitzen, geldirik dauden hegazkinentzako espazioa handitzen, eta zentral elektriko berria eraikitzeko industrigunea antolatzen.

Noaingo aireportua. Urrian inauguratzekoak dira Noaingo aireportuko terminal berria. Kontrol dorre eta pista berria egiten ari dira, eta 28,2 milioi euroko inbertsioa egin du Aenak.

Hondarribiko aireportua. Espainiako Gobernua eta Eusko Jaurlaritza iaz ados jarri ziren honetan: aireportuko pista 200 metroz luzatzea, 150 Mendelu auzo aldera, eta 50 itsaso aldera. Proiektua hasi gabe dago.

Bilboko portua. Aurten hasi dituzte Muskizko Arena hondartzatik hondarra ateratzen Bilboko portuan dragatze lanak egiteko. Guztira, 10 milioi metro kubo hondar aterako dituzte.

Pasaiako kanpoko kaia. Pasaiako Portuko Agintaritzak aurrekontua eta eremua erdira murriztu du. 750 milioi euroko aurrekontua dauka proiektu berriak.