Ximun Fuchs

Manex anaiaren alboan agertu ohi da maiz, eta maiz nahasten dituzte. «Ez dugu berdin pentsatzen, baina bai elkar elikatu», dio. Le Petit Theatre konpainian hasi, eta, urte luzez bertan aritu ostean, Axut konpainian dabil egun, anaiarekin, «euskara betean» sortzeko. Errautsak, Hamlet eta Francoren bilobari gutuna egin ostean, lan berri bat aurkeztuko dute udatik bueltan, Dejabu eta Artedramarekin batera hori ere: Zaldi urdina, Euskal Herrian drogak utzitako markak azaleratu nahi dituen antzerki obra. Zinemagintzan ere badabil, sortzen eta tresnak eraikitzen; orain, Gastibeltza Filmak proiektuan. Izaera «menditarra» duela dio. Egun, Donibane Lohizune du bizileku.