Albistea entzun

LITERATURA

Lurra zapaltzen dutenen esperientziak

Sorkuntzaren hainbat sektoretan euskara ardatz duten hamabi profesional autonomo elkarrizketatu ditu Fermin Etxegoienek 'Eutsiko diogu?' libururako (Erein). Krisi sozio-ekonomikoaren eraginez, galdera bakarra egin die: liburuaren izenburukoa.

Fermin Etxegoien, artxiboko irudi batean.
Fermin Etxegoien, artxiboko irudi batean. Marisol Ramirez / Argazki Press

Igor Susaeta -

2014ko abenduak 19

Ander Lipus, Estitxu Eizagirre, Luistxo Fernandez, Mari Añes Gorostiaga, Eñaut Elorrieta, Miren Amuriza, Hedoi Etxarte, Maider Unda, Iban Arantzabal, Maia Eder Kururutxet, Jon Garaño eta Jose Mari Goenaga, eta Miren Agur Meabe dira Etxegoienekin (Oñati, Gipuzkoa, 1966) solastu direnak.

Galdera jakin bat du abiapuntu Erein argitaletxeak egileari enkarguz eskatutako lanak, baina Etxegoienek gaur goizean Donostian egindako aurkezpenean nabarmendu duenez, abiapuntuko itaun horri besteren bat adarkatzea oso erraza izan da. "Euskarazko espresio bideetara jotzen baldin badugu, ez ote gaude beste krisialdi baten barruan? Badirudi inoiz baino urrutirago heldu dela euskarazko espresio bidea, baina topo egiten duzu indize batzuekin, eta horietako batek esaten du, adibidez, hizkuntzaren erabilera beherantz doala". Beraz, botila erdi hutsik edo erdi beteta ikusten duten galdetu die elkarrizketatuei. "Euskaltzale aktibo batzuei ari gara galdetzen, era berean, ea hizkuntzak eta herriak eutsiko ote dioten". Etxegoienen esanetan, egiten dira irakurketa apokaliptiko batzuk, zera planteatzen dutenak: "Ez ote gaude hasieraren bukaeran?". Dena den, egileak ez du hain apokaliptikoa izan nahi.

Liburuarekin saiatu da, gainera, azken urteotan gailendu den korronte bati erantzuten. "Azken urteotan, teorizazio mailan, loraldi bat gertatu da, ziurrenik unibertsitate giroetan sortutakoa. Oso interesgarria da mundu mailan dabiltzan teorizazioez jabetzea". Idazle eta kazetariak bilatu duena da, ordea, eguneroko lanean oinarritutako esperientzia, lurra zapaltzen dutenena. "Hortik datorren teorizazioa. Izan ere, metafisikara fisikatik ailegatzen zara, eta ez alderantziz".

Hamabi sortzaile horiekin izandako solasaldien emaitza da liburua. Egileak argi utzi nahi du, badaezpada ere, ez dela elkarrizketa liburu trinko bat. "Jendea ohituta dago galdera hausnartu eta trinkoetara, eta gisa bereko erantzunetara. Liburuan ez da hori gertatzen". Etxegoien bera oso modu gorabeheratsuan agertzen da liburuan: "Hitz bat esateko, nire teoria zelebre bat botatzeko... Edo ez naiz agertzen sei orrialdetan!".

Sortzaileek ez dituzte "sekulako errebelazioak" egiten, baina "badago gaia", Etxegoinen aburuz. "Nik uste dut, neurri batean, behintzat, biluztu direla".

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Aktoerak 'Altsasu' antzezlaneko pasarte bat taularatzen ©Oskar Matxin Edesa/ Foku

Altsasuko kasua antzerkira eramango du etzi Arriaga antzokiak

Iñigo Astiz

Maria Goirizelaiak idatzi eta zuzendu du pieza, eta ahozko epaiketako transkripzioak izan ditu abiapuntu. Euskaraz emango dute lana ostegunean, eta gazteleraz ostiralean eta larunbatean

2022ko udazkenean egingo da XVIII. Bertsolari Txapelketa Nagusia

2022ko udazkenean egingo da XVIII. Bertsolari Txapelketa Nagusia

Mikel Lizarralde

Getxon abiatuko da, irailaren 24an, eta finala Iruñean jokatuko da, abenduaren 18an.

Bilboko Rekalde aretoan 90 margolan batu ditu Idoia Monton artista donostiarrak. ©ARITZ LOIOLA / FOKU

Pintura beti itzultzen da

Iñigo Astiz

Idoia Monton artista donostiarrak azken hiru hamarkadatan egindako lanaren berri ematen duten 90 artelan batu ditu Bilboko Rekalde aretoak, 'Zazpi leihoak' izenburupean

Bilbon eman zuten BIMEren jardunaldien xehetasunen berri, atzo. ©BIME

BIME Pro musikaren arloko profesionalen 9. topaketa bihar hasiko da, Bilbon

Erredakzioa

Hilaren 29ra bitarte, hamazazpi herrialdetako 200 hizlari elkartuko dira jardunaldietan. Ostiral eta larunbaterako kontzertuak antolatu dituzte

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.