Mahoma negarrez, Je suis Charlie —Ni Charlie naiz— dioen kartel bat eskuetan duela, eta, gainean, mezu bat: "Dena barkatuta dago". Hori da Charlie Hebdo astekari satirikoak gaur argitaratu duen zenbakiaren azala.
Zenbaki berezia da; iragan asteazkenean ustez Said eta Sherif Kouachi anaiek aldizkariari eraso egin eta hamabi lagun hil osteko lehena. Astekariko beharginak Libération egunkariko egoitzan aritu dira lanean, eta hiru milioi ale argitaratzea zen asmoa, baina eskaerari erantzun ahal izateko beste bi milioi ale aterako dituztela iragarri dute. Normalean 60.000 ale argitaratu ohi dituzte astero, eta horietatik 30.000 bat saldu.
Zortzi orrialde ditu, eta Canal+, Le Monde eta Libération-en laguntza izan du horretarako. Richard Malka astekariko bozeramaile eta abokatuak esan zuen erasoaren ondoren geratzen zaien "energia apurra" gaurko zenbakia prestatzeko erabiliko zutela.
