EH Baik izanen dituen bi departamendu kontseilari bakarrak nagusitu zaizkie nasaiki Fronte Nazionalekoei. Alain Iriart eta Fabienne Ayensak bozen %78,05 erdietsirik, Dave Dagerre eta Anais Mendilahatxu eskuin muturrekoak %21,95etan uzten dituzte.
EH Baiko hautagaiek kasik 4000 boz gehiago bildu dituzte lehen itzuliari konparatuz, Fronte Nazionalekoek 400 bat bozez emendatzen dutelarik emaitza.
Lehen itzulian baino hirurehun bat bozkazale gehiago izan da igande honetan, erran daiteke beraz EH Baik lehen itzuliko beste hautagaien bozkazaleen sostengua ukan duela eskuin muturraren parean.
Departamenduko lehendakaria hautatzeko mementoan ikusi beharko da Alain Iriartek eta Fabienne Ayensak noren alde egiten duten.
