Euskal Presoak

Iñaki Bilbaoren senideek istripua izan dutela salatu du Etxerat-ek

Asteburuan gertatu zen ezbeharra, Arkautin (Araba). Aurtengo bigarrena da. Elkarretaratzeak antolatu dituzte hiriburuetan.

Agerraldia egin du Etxerat-ek gaur Gasteizen. / Etxerat

Berria -

2016ko otsailak 23

Etxerat elkarteak jakinarazi du joan den asteburuan Iñaki Bilbao euskal presoaren senideek istripua izan zutela, Arkautin (Araba), hura ikustera zihoazenean. "Sakabanaketak eragindako bigarren istripua izan da", salatu du elkarteak, Gasteizen egindako agerraldi batean. "Guk bidaiatzen jarraituko dugu; hori da bisitak egiteko eskubidearengatik ordaindu behar dugun prezioa. Baina erantzukizuna ez da gurea; hori beste batzuei dagokie".

Hala, Bilbaoren senideek izandako istripua salatzeko elkarretaratzeak antolatu ditu elkarteak: gaur 19:00etan Bilboko Areatzan, eta bihar ordu berean Donostiako udaletxe aurrean eta Gasteizen Andre Maria Zuriaren plazan. Iruñean atzo egin zuten protesta, PPren egoitzaren aurrean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna