Gaur eman ditu lehen pausoak Euskal Elkargoak. Ipar Euskal Herria bere baitan hartzen duen lehen erakundeak lehen batzarra egin du Baionan, 18:30ean hasita, eta presidente nor izango den hautatu dute: Jean-Rene Etxegarai Baionako auzapeza. Bernard Lougarot Gotaine-Irabarnekoa (Zuberoa) eta Dohienart Angeluko PCFkoa ziren lehendakaritzarako beste hautagaiak.
231 hautetsi ziren bozka ematekoak, eta 157 boto jaso ditu Etxegaraik. Hautatua izan ostean, hitzaldia egin du: "Lan handia dugu aurrean, baina ez gaitu beldurtzen", esan du. Emandako misioa "duinki" beteko duela ere hitz eman du Lapurdi, Nafarroa Behere eta Zuberoa biltzen dituen lehen erakundeko lehendakariak.
Euskal Elkargoa osatzea iaz erabaki zuten Iparraldeko herriko etxeek, bozketa bidez; gehiengo handi batek bozkatu zuen erakunde berriaren alde. Urteetako borrokaren ondoren, berezko lehen instituzioa dute, ondorioz, Lapurdi, Nafarroa Behere eta Zuberoak. Helmuga da batzuentzat, abiapuntua besteentzat, eta aukera emanen du Ipar Euskal Herri mailako politika publikoak egiteko.
Hiru gune nagusi izanen ditu erakundeak: 233 kideko elkargo kontseilua, 69 kideko batzorde iraunkorra eta 25 kideko batzorde eragilea. Ondoan, orain arteko hamar herri elkargoen eremuko lurralde poloak izanen dituzte, "hurbileko zerbitzua bermatzeko", eta eskumenen araberako sindikatuak. Bi aholku batzorde ere izanen dira. Batetik, Auzapezen Biltzarra, eta, bestetik, Garapen Kontseilua, gizarte zibileko eragileek ere beren hitza izan dezaten.
Euskaltzaindiak eta Euskal Konfederazioak eskatu bezala, Euskal Elkargoak hasieratik hartuko du hizkuntz eta kultur politikaren eskumena. Horrekin batera, hamar herri elkargoek orain arte zituzten eskumenak ere izanen ditu; besteren artean, garapen ekonomikoa, lurralde antolaketa, ingurumena eta etxebizitza. Bi urteko epean, eskumen horiek elkargo mailan atxiki ala herriei itzuli erabaki beharko du. Herriei itzultzen zaizkien eskumenak kudeatzeko, sindikatu gehiago sortu beharko dituzte.
