ETA-ren armagabetzea

Babes politiko eta sozial zabala armagabetzeari

Euskal Herrian nahiz nazioartean, politikagintzan nahiz gizarte eragileen artean, kolore ia guztietako alderdiek eman diote sostengua apirilaren 8ko ekinbideari.

Babes politiko eta sozial zabala armagabetzeari
Babes politiko eta sozial zabala armagabetzeari

Jon O. Urain -

2017ko apirilak 7 07:28

Batzuk Baionan izango dira larunbatean, beste batzuk ez, baina, edozein kasutan, Euskal Herriko gehiengo politiko, sindikal eta instituzional batek adierazi dio babesa, modu batera edo bestera, ETAren armagabetzeari. Jean Noel Etxeberri Txetx-ek armagabetzearen data jakinarazi zuenetik, etengabeak izan dira harekiko tokiko nahiz nazioarteko eragileek plazaratu dituzten jarrera hartzeak.

Gehien-gehienak, armagabetzea babestearen aldekoak. Esanguratsuena, asteazkenean Bilbon irudikatutakoa; prentsaurreko batean, desarmatzeari sostengua adierazteko adierazpen bateratu bat aurkeztu zuten Hego Euskal Herriko eragile politiko eta sindikal nagusiek. Tartean ziren EAJ, Geroa Bai, EH Bildu, Araba, Bizkai eta Gipuzkoako nahiz Nafarroako Ahal Dugu, PSE, Ezker Anitza, ELA, LAB, UGT eta CCOO. Ezkerrak ere bat egin zuen, nahiz eta prentsaurrera ez agertu.

Adostasuna ere oso zabala izan da Iparraldean. Horren adierazgarri, larunbateko deialdiarekiko atxikimendua adieraziz agerraldi bat egin zuten eragile eta pertsonen zerrenda. Horiek iragarri zuten "milaka" izango direla bakearen artisauak apirilaren 8an. Horien artean daude Sylviane Alaux PSko diputatua, Max Brisson Pirinio Atlantikoetako presidente ordea, Kotte Ezenarro Hendaiako auzapeza, Michel Veunac Miarritzeko auzapeza eta Martine Bisauta Euskal Elkargoko presidenteordea. Hain justu, larunbat goizean batzartzekoak dira Euskal Elkargoko 233 hautetsiak.

Frantziako Estatuak ere babes zabala eman dio apirilaren 8ko ekinbideari. Dozenaka lagunek eta eragilek sostengua adierazi diote armagabetzeari, eta gaineratu "ezinbestekoa" dela Euskal Herriaren etorkizunerako. Bakearen artisauen ekinaldia txalotu dute, eta Frantziako agintariei eskatu diete ez dezatela oztoporik jar.

Sinatzaileen artean daude Michel Tubiana Frantziako Giza Eskubideen Ligako ohorezko presidentea, Yannick Jadot europarlamentaria, Julien Bayou Europe Ecologie Berdeetako Frantziako bozeramailea eta Susan George Attac-eko ohorezko presidentea.

Alor sindikalean, berriz, Ipar Euskal Herriko, Bretainiako, Korsikako, Kanakyko eta Frantziako zenbait sindikatuk agiri bat plazaratu dute, ETAren armagabetzeari eta arlo horretan bakearen artisauek egindako lanari sostengua emateko. "Frantziako agintariei eskatzen diegu oztoporik ez jartzeko ETA guztiz desarmaturiko erakundea izan dadin", esan dute CFDT, LAB, CNT, Frantziako eta Euskal Herriko Solidaires, Sytrail, STC (Korsika), SLB (Bretainia), USTKE (Kanaky) eta beste zenbait sindikatuk.

Bestalde, Foro Soziala izan da urteotan gizarte zibila bakegintzan aktibatu duen eragile nagusietakoa. Orain Foro Sozial Iraunkorra denak ere sostengua eman dio armagabetzeari, eta nabarmendu du "gatazkaren gainerako ondorioak arrazoizko parametroetan konpontzeko" bultzada ekarri behar duela.

Instituzioen babesa

Alor instituzionaletik ere heldu zaio babesa armagabetzeko egitasmoari. Eusko Legebiltzarreko talde guztiek, PPk izan ezik, ETAri eskatu diote "ahal den azkarren" egin dezala armagabetzea, eta prozesua "bakarra, alde bakarrekoa, osoa eta behin betikoa" izan dadila. Bestalde, testuan Nazioarteko Egiaztatze Batzordeari galdegin diote jarraitzea helburu hori betetzeko "lan ona" egiten, eta ontzat jo dute, halaber, ETAren armagabetzea lortzeko gizarte zibilak eta erakundeek erakutsitako inplikazioa. Jaurlaritzak ere esana du bitartekari ariko dela.

Armagabetzearekin engaiatu da Nafarroako Parlamentua ere, adierazpen instituzional bat gehiengoz onartuta. Eusko Legebiltzararen legez besteko proposamenaren edukiaren antzekoak jaso zituen Geroa Baik, EH Bilduk, Ahal Dugu-k, PSNk eta Ezkerrak babestutako agiriak. Halaber, apirilaren 8ko ekinbideak euskal gatazkaren ondorioei irtenbidea emateko "sekulako" garrantzia duelakoan, babesa adierazi dio Udalbiltza Euskal Herriko Udalerrien Biltzarrak.

Nazioarteko elkartasuna ere jaso du Apirilaren 8ak. Esaterako, EFA European Free Alliance-n batzar nagusiak aho batez onartu du EAk ETAren armagabetzearen alde aurkeztutako mozioa. Ongietorria eman dio neurriari, eta poztu egin da euskal alderdi gehienek babesa agertu dutelako. Horrez gain, Basque Friendship Group bake prozesua babesteko europarlamentarien taldeak ontzat jo du ETAren armagabetze prozesuaren iragarpena, eta Espainiako eta Frantziako Gobernuei galdegin die prozesua "ahalbidetu" dezatela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Ahotsak-en adierazpena

Ahotsak-ek adierazi du bakea ez dela «indarkeriarik eza bakarrik»

Maddi Ane Txoperena Iribarren

Taldea sortu eta hamabortz urtera, Euskal Herriko 78 emakumek oroitarazi dute gatazken konponbideetan andreek «ezinbesteko partaide» izan behar dutela. Bortz puntuko adierazpen bat osatu dute. Bertzeak bertze nabarmendu dute bizikidetzaren bidean emakumeek «gertatutakoaren kontakizun inklusiboa eta egiazkoa egiteko» lan egin behar dutela.

Josu Urrutikoetxea, joan den azaroaren 17an, Parisen. ©CHRISTOPHE PETIT TESSON / EFE

Urtarrilaren 6an emanen dute Urrutikoetxearen estradizioari buruzko erabakia

Maddi Ane Txoperena Iribarren

Gaur iragan da Luis Hergetaren (1980) hilketari buruzko estradizioa aztertzeko auzi saioa, Parisko Dei Auzitegian. Defentsaren abokatuak estradizioaren aurka egin du, eta fiskaltzak, berriz, informazio gehigarria eskatu du.

Altsasuko auziaren laugarren urteurrenean herrian jarritako murala, gazteen omenez ©Idoia Zabaleta / Foku

Jon Ander Cob eta Julen Goikoetxea kalera irten dira, baimenarekin

Berria

Altsasuko Gurasoak taldeak sare sozialetan jakinarazi duenez, bigarren graduan diren bi gazteek espetxean egingo dute lo, eta asteburuak kartzelan egin beharko dituzte

Espainiako Auzitegi Gorenak zigorrak bertan behera utzi ondoren egindako agerraldia, abuztuan, Donostian. ©Juan Carlos Ruiz / FOKU

Espainiako Auzitegi Gorenak hilaren 15ean erabakiko du 'Bateragune auzia' berriz egin ala ez

Maddi Ane Txoperena Iribarren

Fiskalak epaiketa berriro egiteko eskatu zuen azaroan. Giza Eskubideen Europako Auzitegiak 2018an ebatzi zuen akusatuen eskubideak urratu egin zirela epaiketan, eta, ondorioz, Espainiako Auzitegi Gorenak 2012an jarritako zigorrak baliogabetu egin zituen uztailean Gorenak berak. 

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna