Gaurko osoko bilkuran, lesbiana, gay, bisexual, transexual, transgenero eta intersexualen (LGTBI+) berdintasun sozialeko foru legea onetsi du Nafarroako Parlamentuak, gehiengo osoz. PSNk aurkeztu zuen proposamena, eta gobernua babesten duten lau indarrek ez ezik, eragile sozialek ere ekarpen ugari egin dizkiote lege proiektuari azken hilabeteetan. Legearen xedea da “printzipioak, baliabideak eta neurriak ezartzea eta arautzea, LGTBI+ pertsonen eskubideak eta benetako berdintasun gauzatua erabat bermatzeko, bidea izanik sexu-joera, genero-adierazpen eta sexu- edo genero-identitateagatiko diskriminazio ororen prebentzioa, zuzenketa eta deuseztapena, Nafarroako Gobernuaren eta toki entitateen eskumenekoak diren esparru guztietan”.
Zehazki, eremu zibila, lanekoa eta soziala, osasuna, hezkuntza, ekonomia, kultura, arlo publikoa eta instituzionala aipatzen dira arau berrian "benetako babesa bermatuz, berdintasunerako, ikusgarritasunerako eta diskriminaziorik ezerako eskubidea urratzera eraman dezaketen egoeren aurrean". Besteak beste, transexualitatearen despatologizazioari, administrazioan protokoloak eta prestakuntza egitasmoak aplikatzeari eta hezkidetzari egiten die erreferentzia legeak.
LGTBI+ komunitateko ordezkari ugari egon dira legebiltzarrean, osoko bilkura gonbidatuen harmailatik ikusten. Txalo eta algara artean hartu dute legearen onespena.
