Burundin gizateriaren kontrako krimenak izan direla salatu du NBEren ikerketa batzordeak. 2015eko apirilaz geroztik urraketa larriak izan direla jaso du NBEk txostenean, eta Nazioarteko Zigor Auzitegiari eskatu dio ikerketa abia dezala ahalik eta lasterren.
NBEk ziurtatu duenez, Burundin epairik gabeko ehunka heriotza zigor izan dira, milaka atxiloketa arbitrario, ehunka pertsona desagertu eta torturatu, eta sexu erasoen dozenaka biktima zenbatu ditu.
Gizateriaren krimenen kontrako erasoak Burundiko inteligentzia zerbitzu nazionaleko kideei, Poliziari eta armadari egotzi dizkie ikerketa batzordeak. Baita Pierre Nkukurunziza herrialdeko presidentearen alderdiko gazte elkarteari ere. Txostenaren arabera, Nkurunziza eta haren gertueneko jeneralek hartu dituzte "erabaki garrantzitsuak, giza eskubideen urraketa larriak ondorio dituztenak barne".
Nkurunzizaren oposizioko kideak eta haren familiakoak eta gertukoak dira erasoen biktimak, Françoise Hampson ikerketa batzordeko kidearen arabera. Gertaerak ezin daitezke genozidiotzat hartu, Hampsonen esanetan, baina botere maila gorenetik "gorroto diskurtsoa hedatu" dela salatu du.
NBEko ikerketa batzordeak 2015eko apirilean kokatu du erasoen gorakada; hain justu, Nkurunzizak hirugarren aldiz jarraian gobernatzeko aurkeztuko zela iragarri ostean.
Ikerketa batzordearen txostenak oposizioko talde armatuen giza urraketak ere jasotzen ditu. Askoz maila apalagoan, hala ere, estatuko indar armatuekin alderatuta.
Burundiko Gobernuak herrialdean sartzea debekatu zion NBEko ikerketa batzordeari, eta ikerlariak Afrikako hainbat herrialdetan errefuxiatuta dauden herritarrekin bildu dira egoeraren berri jasotzeko.
