PDECatek alderdi subiranisten hauteskunde zerrenda bateratua eratzeko aukera guztiak baliatuko ditu. Carles Puigdemont Kalatuniako presidentearen alderdiak hauteskunde zerrenda propioak prest dituen arren —lurralde batzordeetan onartu dituzte azken egunetan—, zerrenda horiek oraindik ez berrestea erabaki du, eta atzeratu egin du larunbaterako aurreikusia zuen kontseilu nazionala, hurrengo asteazkenera arte.
Abenduaren 21eko hauteskundeetarako koalizioak aurkezteko epea asteartean amaitu zen, eta, beraz, zerrenda bateratua eratzeko aukera bakarra hautesle-elkarte bat osatzea da. Aukera horren alde agertu da Puigdemont, eta haren presioak behartu du egutegi aldaketa. "Ziur nago herri hautagaitza bateratuaren aldeko ahaleginak mereziko duela", adierazi du Merce Conesa alderdiaren kontseilu nazionaleko presidenteak.
