Epaileak espetxetik ateratzeko fidantza jarri eta ordubete atera dira Alcala-Mecotik Dolors Bassa eta Meritxell Borras. Hilabete bat egin dute kartzelan, eta gaur Pablo Llarenak 100.000ko fidantza onartu ondoren atera dira kalera, Ara egunkariak jakinarazi duenez. 18:30 inguruan atera dira, berriz, Jordi Turull Generalitateko bozeramailea, Raul Romeva Atzerri kontseilaria, Carles Mundo Justiziakoa eta Josep Rull Lurralde Antolamendukoa.
Bassak eta Borrasek senideak eta ERCko eta PDECATeko ordezkaritza zabal bat zuten espetxe atarian zain. Baita bi alderdi horiek Espainiako Kongresuan dituzten bozeramaileak ere, Joan Tarda eta Carles Campuzano, eta Anna Simo Kataluniako Parlamentuko lehen idazkaria eta David Bonvehi PDECATeko burua.
Borras makuluekin atera da, kartzelan kirola egiten orkatila bihurritu baitzuen. Duela gutxi Bassa eta Borras buztingintza tailer batean eman zuten izena.
Romeva, Bassa eta Mundo hautagai dira abenduaren 21eko bozetan ERCren zerrendan, eta Turull eta Rull PDECatenan. Ez da aurkeztuko, berriz, Borras.
