Mas, Rovira eta Gabriel ere auzitara
Espainiako Auzitegi Gorenak matxinada egotzita aurrera daraman auzian Artur Mas Generalitateko presidente ohia, Marta Rovira ERCko idazkari nagusia eta Anna Gabriel CUPeko diputatu ohia ere ikertzea erabaki du.
Pablo Llarena epaileak ikertutako jendearen zerrenda luzatu du, eta hiru horiez gain, zerrendan sartu ditu Marta Pascal PDeCATeko koordinatzailea, CUPen legebiltzar taldeko lehendakari Mireia Boya eta AMI independentziaren aldeko udalerrien elkarteko lehendakari Neul Lloveras.
Ikertuek ez dute jakinarazpenik jaso oraindik, eta La Vanguardia-ren arabera, ostiralean jaso dezakete. Iturri horren arabera, ez dituzte deklaratzera deituko.
Epaileak idatzi du, ikertzen ari diren gertaerak zuzentzen hainbat laguneko taldea aritu zela, eta haien artean leudeke legebiltzarreko taldeetako buruak eta alderdietako idazkari nagusi eta presidenteak.
Zerrendan dauden pertsona guztiak bileraren batean egon direla baieztatuta dagoela argudiatu du epaileak, eta egozten dien matxinada bilera horietan prestatu zela. Guardia Zibilaren arabera, gainera, ikertuko dituen pertsona horiek ezinbesteko lana egin zuten "prozesua bururaino eramateko".
28 dira ikertuak, jada.
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
