Iñigo Martinezen fitxaketak zalaparta bat baino gehiago ekarri du: Realetik Athleticera joateak eragindakoa bat, horretarako erabilitako diru kopuruaren ondoriozkoa bestea, eta Martinezek berak idatzi eta sareetan zabaldutako gutunak sorturikoa bestea.
Euskaraz eta gazteleraz idatzi du oharra, eta aurrena ondarroarrez egin du. Atzo argitaratu zuen oharra, eta berehala hasi ziren, Twitterren bertan, lehenenego salaketak:
@Mantarrei@InigoMartinez Ba neri ondarrutar txukun xamarrian idatzitta dagola begittantzen jata.
— Oier Gorosabel (@Txikillana) 2018(e)ko urtarrilak 30
Realeko gizonezkoen lehen taldean sareetan euskaraz idazten dutenek ez dute @plazaberri-k dioena betetzen. Hori bai, denek amen egiten diote Espainiako RAEri.
— Mikel Iturria (@iturri) 2018(e)ko urtarrilak 30
Eta segida izan du eztabaida horrek, euskara batuaren eta euskalkien erabilerari buruzkoak. Noiz, non eta zer erabili behar den.
Bere agurra irakurrita zalantzan geratu zait ez ote den analfabetoa euskaraz.
— Joseba Arzallus (@arzallus_joseba) 2018(e)ko urtarrilak 30
@aiertgoenaga Eremu erdalsunetako ikasleekin ikusia dut: euskalduntasun autentizismo moduan bizi dituzte halako euskalki alarde lekuz kanpokoak, eta baztertuak sentitzen dira
— Idurre Eskisabel (@idurreski) 2018(e)ko urtarrilak 30
Nitzako kezkagarrixe futbolari batek euskalki baten idaztearren sortu'ran naste dana'ra beran taldekide batzuk euskaraz sekule berba bat ein ez dabenin. Hoixe'ra kezkagarrixe.
— Aiert Goenaga (@aiertgoenaga) 2018(e)ko urtarrilak 30
Galdetu Barakaldoko euskaldun gazteei zer nola sentitzen diren klaseko aurkezpen batean ikaskide urolakostatarrak euskalkian tematzen direnean
— Idurre Eskisabel (@idurreski) 2018(e)ko urtarrilak 30
Edo gure nagusiak. 'Ze ipintxen dau hor gazte? Ze on resultaten da erderaz ez jakitxiaz gain euskeraz be eztakiaule. Hauxe'ra panorami.'
— Aiert Goenaga (@aiertgoenaga) 2018(e)ko urtarrilak 30
Gure aita ataundar eta ama mutrikuarrak @berria eta @argia arazo gabe leitzen dituzte, aspaldi ulertu zutelako euskarari etorkizuna bermatzeko bidea zein den, eta autoformazio ahalegina egin dutelako
— Idurre Eskisabel (@idurreski) 2018(e)ko urtarrilak 31
Beldurtuta hari honekin. Argi eta garbi azaldu dutena ulertu nahi ez eta demagogiara jo gainera. Batuak helburu bat du, funtzio bat. Gure hizkuntzak etorkizun bat izatea nahi badugu ume eta txakurrekin hitzegitetik haratago bultzatu egin beharko genuke gure erosotasunak ahaztuz.
— Mikel Alvarez (@theindezents) 2018(e)ko urtarrilak 31
Jo Mikel, benetan, nire hautua batuan idaztea litzateke. Baina euskalkian idazten badu norbaitek (kasuen %0'005a) ez naiz asaldatuko. Tolerantzia maila altuagoa dut batzuekin (ez da ez Etbko aurkezlea, ez lehendakaria, kirolari bat da. Gainera bakarra). Ez besterik.
— Aiert Goenaga (@aiertgoenaga) 2018(e)ko urtarrilak 31
...eta, bitartean, berezko euskalkirik gabeko eremu latz horretako euskaldunak (milaka euskaldun) beren berezko hizkuntzaren (hau da, batuaren) funtzioa zalantzan jartzen duen enegarren eztabaidari begira.
— Manex Agirre (@Manexagirre) 2018(e)ko urtarrilak 31
Hau dio BERRIAren estilo liburuak gaiaz: "Euskara batu estandarrean idazten da BERRIAn. Eredu horretan, euskalki guztiek bat egiten dute, beren aberastasun lexiko eta sintaktikoarekin, estandarizaziorako Euskaltzaindiak zehazturiko irizpideen barruan".
BERRIAk ere landu zuen gaia 2016an. Irene Arrarats BERRIAko Euskara arduradunak erreportai horretan azaldu zuen "faltsua" dela euskalkien eta batuaren arteko dikotomia: "Batuak euskalkietatik edaten du, eta, aditz paradigma-eta alde batera uzten badugu, batua eta euskalkiak bat dira, goitik behera".
Andres Urrutia euskaltzain buruak adierazi zuenez, desadostasunak eta desorekak izan dira batuaren eta euskalkien artean. "Batzuk, batu nahian, euskalkietatik ahaztu egiten dira; beste batzuek, euskalkietan, txokokerietan ibili nahian, guztiok batzen gaituen horretatik ihes egiten dute".
Euskalkia noiz erabili eta batuan noiz jardun galdetuta, arreta erregistroan jarri zuen Arraratsek. "Erregistroak ez ditugu ondo bereizten, eta, askotan, erregistroei buruz aritu behar genuke, eta idatziaz eta ahozkoaz, eta ez batua/euskalkiak dikotomiaz".
Xabier Amuriza bertsolariaren iritziz, erabilera okerrak ari dira zabaltzen. "Idatzita ikusten dira azpieuskalkien eredu lokalak, ia-ia makarrak esateko moduan. Orain dela 50 urte, analfabetoek ere ez zuten horrela idazten. Hori dago modan: hitz egiten den moduan idaztea, fonetismo guztiekin. Maila kulturalean atzerakada handia da".
Arriskutsua deritzo Urrutiak hitz egiten den bezala idazteko joerari. "Fonetismoak eta ahoskeriak, tokian tokikoagoa egiteko... Bakoitza bere aldetik hasten bagara idazten, hizkuntza grafitizatzen, gure arteko komunikazioa ezinezkoa izango da".
Hala ere, Arraratsek argitu zuen batuan egiteak ez duela denen hizkera berdin bihurtu behar. "Batasuna ez da denean denok berdin egitea, baizik eta denok denona ulertzea".
BERRIAren Facebookeko orrialdean ere zabaldu da eztabaida.
