Zipre

Anastasiadisek presidente izaten jarraituko du

Alderdi kontserbadoreko burua bozen %56rekin gailendu zaio Malas ezkerreko hautagaiari.

Nikos Anastasiadis Zipreko presidentea hauteskunde garaipena ospatzen, atzo, Nikosian. /
Nikos Anastasiadis Zipreko presidentea hauteskunde garaipena ospatzen, atzo, Nikosian. / Katia Christodoulou/EFE

Berria -

2018ko otsailak 5

Bigarrenez irabazi ditu hauteskundeak Nikos Anastasiadisek, eta Zipreko presidente kargua berrituko du.

DISY alderdi kontserbadoreko presidentegaiak bozen %56 jaso ditu, bigarren itzulian. 2013an gertatu bezala, aurkari izan du Stavros Malasa AKEL ezkerreko alderdiko hautagaia. Malasak bozen %44 bildu ditu.

Anastasiadisek orain bost urte hasitako bideari segida emateko aukera izango du garaipenarekin. Orduan, agintea hartu eta hilabetera 10.000 milioi euroko erreskatea sinatu zuen, nagusiki, bankuei bideratzeko. Presidenteak nabarmendu du oso bestelako egoeran dela herrialdea orain, eta ekonomia hazkundeari eutsi nahi diola —2017an, %3,9 hazi da Zipreko BPG—.

Agintaldi hasierarako lehentasunen artean aipatu du Mustafa Akinci Zipre turkiarreko buruarekin harremanetan jartzea, irlaren batasunerako negoziazioak berreskuratzeko. Joan den udan eten zituzten elkarrizketak, adostasuna lortzeko saiakerek porrot egin zutela eta.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna