Artea

Alejandro Garmendia guztiak, Kubo-Kutxa aretoan

'Alejandro Garmendia. Paisaiak, enigma eta malenkonia' erakusketa antologikoak artistak jorratu zituen bide ugariak bildu ditu.

Mikel Lizarralde -

2018ko martxoak 1

Joan den urtean hil zen Alejandro Garmendia (Donostia, 1959), 57 urte eskas zituela, eta urtebete igaro denean, haren obra osoa ezagutzeko aukera eman du Kubo-Kutxa aretoak Donostian. Hasi 80ko hamarkadaren erdialdean landu zituen komiki eta marrazkietatik, eta 2000ko urteetan margotu zituen olio handietara iritsi arte. Baina horiekin batera, Garmendiaren ikuspegi ireki eta ikonoklasta erakusten duten bestelako obrak ere ikus daitezke erakusketan: paper gainean egindako collageak, egurrarekin egindako eskulturak, ikus-entzunezko lanak, musika obrak... "Diziplinen artean mugitzeko joera eta jarrera izan zuen beti", adierazi du gaur goizean egindako aurkezpenean Fernando Golvano erakusketako komisarioak. "Mugak zeharkatu nahi zituen, eta ate berriak ireki". Erakusketa bihar arratsaldetik aurrera egongo da irekita maiatzaren 27ra arte.

Nomada izan zen Alejandro Garmendia Sander. Nomada bizitzan eta nomada artean. Batetik bestera mugitu behar izan zuen munduan, hasieran derrigorrez —Frankismoaren azkeneko urteetan erbestean bizi behar izan zuen familiarekin, lehenik Bordelen eta gero Parisen—, eta ondoren bizihanahiaz —Bilbon, Madrilen, New Yorken...—. Eta horrek nomada bihurtu zuen artean ere. Margolaritza eta collagea landu zituen, baina arte grafikoetan, komikian eta bideoan ere aritu zen, eta izan zen musikaria ere. Hain zuzen ere, musika esperimentala egin zuen, baina baita kutsu dadaistako pop lanak ere.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna