ANC Biltzar Nazional Katalana Carles Puigdemont Kataluniako presidente izendatzearen alde agertu da berriz ere. Torrentek Sanchez hautagai proposatuko duela jakinarazi eta ordu gutxira berretsi du bere jarrera, ohar bidez. "Izendapen hori da gure auzia nazioartean hoberen zabalduko duena eta hautesle independentisten sentimendua islatzen duena", adierazi du elkarteak.
Sanchezen inbestidura bultzatzea "ulertzen" duela azaldu du ANCk, Espainiako erakundeek oinarrizko eskubideak urratzen dituztela salatzeko baliagarria izan daitekeela iritzita. Aldiz, nabarmendu duenez, "estrategia juridikoaz gain, oinarrizkoa da eraso demokratikoari erantzun politikoa ematea".
Erantzun horrek ardatz izan behar du "printzipio demokratikoarekiko eta herri katalanaren subiranotasunarekiko errespetua". Horrenbestez, ANCren esanetan, egoerak derrigorrean eskatzen du Puigdemont presidente izendatzea.
Torrentek Sanchez proposatu du Generalitateko presidente izendatzeko hautagai, parlamentuko taldeetako ordezkariekin erronda egin ostean. Inbestidura saiora aste honetarako deituko duela iragarri du.
Diru publikoaren erabilera bidegabea ere, zalantzan
Alemaniako Justiziak joan den astean ebatzi zuen Puigdemont ezin dela Espainiara estraditatua izan matxinada delituarengatik, presidente kargugabetuari indarkeria leporatzeko oinarri nahikorik ez dela iritzita. Schleswig-Holsteingo Lurralde Auzitegiak erabakiaren berri emateko argitaratu zuen testuan, Espainiaren eskariari gabezia gehiago ikusten dizkiola argitaratu dute gaur Kataluniako hainbat hedabidek. Azaldu dutenez, epaileak zalantzan jarri du Puigdemonti diru publikoaren erabilera bidegabea leporatzeko funtsik ba ote den ere, eta informazio gehiago eskatu dio Espainiako Auzitegi Gorenari.