Nafarroako Ahal Dugu-ko sektore kritikoko kideek talde parlamentarioaren izen aldaketa erregistratu dute gaur goizean. Laura Perezek, Carlos Cousok, Ruben Velascok eta Fanny Carrillok zehaztu dute eurek osatutako taldeak aldaketa egiteko beharrezkoak diren baldintzak betetzen dituela. Horien artean kokatu dituzte taldearen barruan gehiengoa izatea eta taldeko bozeramailearen sinadura. Couso da Ahal Dugu-ren bozeramailea Nafarroako ganberan.
Ainhoa Aznarezek, Mikel Builek eta Teresa Saezek osatutako sektore ofizialak, aldiz, uste du aldaketa egin ahal izateko talde guztiaren oniritzia behar dela. Hori dela eta, txosten juridiko bat eskatuko dutela adierazi dute.
Sektore kritikoko parlamentariek prentsaurrekoa eskainiko dute bihar, izen aldaketaren nondik norakoak argitu eta taldearen egungo egoeraren inguruko xehetasunak emateko.
