Kurzek prentsaurrekoan adierazi duenez, imam horiek atzerritik jasotzen dute finantzaketa; ustez, Turkiatik. Ankarak segituan erreakzionatu du. Gobernuko bozeramaile Ibrahim Kalinen esanetan, neurria "islamaren kontrakoa" eta "arrazista" da.
"Sozietate paraleloek, islam politikoak eta estremismoak ez dute lekurik Austrian", adierazi du prentsaurrekoan Kurz kantzilerrak. Ondoan zuen Heinz-Christian Strache kantzilerordea, FPO eskuin muturreko alderdikoa.
Erabaki hori hartu du Austriak, irudi batzuk ikertu ondoren. Irudi horietan haur batzuk ageri ziren uniforme militarrarekin jantzita, eta Galipoliko bataila ari ziren birsortzen; hain zuzen, I. Mundu Gerran Otomandar Inperioak aliatuei irabazi zien borroka handiena da Galipolikoa.
Joan den abendutik da Kurz kantzilerra, eta gobernu berriko sei ministerio FPO alderdiko ultraren esku daude.
