Iazko azaroaren 13an Espainiako armadako 30en bat kidek Astigarragan (Gipuzkoa) egindako entrenamendu militarren inguruan galdera batzuk egin zizkion Marian Beitialarrangoitia EH Bilduko diputatuak, biharamunean, Espainiako Gobernuari; besteak beste, ea armadak baimenik eskatu al zuen Astigarragako Udalean edo Eusko Jaurlaritzako Herrizaingo Sailean. Militarrek kanta "matxistak" abestu izana ere aipatu zion.
Gobernuak urtarrilaren 21eko data duen erantzuna igorri dio Beitialarrangoitiari, eta aitortu dio ez zela baimenik eskatu entrenamemdu militarrak egiteko. "Egun hartako martxan Astigarragako herrigunea ahal zen biderik motzenetik gurutzatu zen; 350 metro baino ez ziren egin. Horrelako kasuetan, ez zaio inolako eskaerarik egiten udalari edo Jaurlaritzako Herrizaingo Sailari". Gobernuak dio zortzi kilometro baino gehiagoko entrenamendua egin behar zutela militarrek, eta neurri horretako saioetarako ez dagoela tokirik Loiolako (Donostia) kuartelean.
Abestiei dagokienez, armadako kideek "taldea kohesionatzeko helburuarekin soilik" abestu zituzten kanta haiek, gobernuaren erantzunak dakarrenez. Esan du Defentsa Ministerioaren "kezka" dela "genero berdintasuna zorrotz errespetatzea" eta "zaintza" lanak egiten dituztela "etengabe". "Mingarria edo pertsonen duintasunaren aurka doan edozein kanta edo adierazpen berehala baztertzen dira".
