Euskal Herritik Mendabaldeko Saharara joandako hiru ekintzaile atxilotu ditu Marokoko Poliziak, Equipe Media hedabideak jakitera eman duenez. Komunikabide horretako bi kide ere atxiki dituzte. Dagoeneko aske daude. Mendebaldeko Saharako lurraldeetatik kanporatu dituzte. Espainiako Estatuak Agadirren duen kontsulatura joan dira hiru ekintzaileak, baina, azaldu dutenez, momentuz ezin diete laguntzarik eman.
ANAS Saharako Adiskideen Nafarroako Elkarteko hiru kide —Alberto Jolis, Iratxo Bakedano eta Maria Perez de Larraia— joan ziren aurreko astean Marokora, Mendebaldeko Saharan "sartzeko" helburuarekin. "Turista" gisa egin zuten bidaia, herrialdetik kanpora ez ditzaten. Joan aurretik bidalitako ohar batean azaldu zuten bidaiaren helburua zela Mendebaldeko Saharako herritarrek pairatzen dituzten giza eskubideen urraketak salatzea.
