Mendebaldeko Sahara

Hil egin da asteburuan bere buruari su eman zion gazte sahararra

Ahmed Salem Laarousik Mendebaldeko Saharako okupazioa salatzeko eman zion su bere buruari. Marokok ukatu egin dio familiari gaztea jaioterrian lurperatzea. Bideoa, albistearen amaieran.

Errefuxiatu guneetan ere protestak egin dituzte elkartasuna adierazteko.
Errefuxiatu guneetan ere protestak egin dituzte elkartasuna adierazteko. BERRIA.

Kristina Berasain Tristan -

2019ko otsailak 6

Ahmed Salem Laarousi 23 urteko gazte sahararrak bere buruari su eman zion aurreko larunbat eguerdian, Gergueraten, Mendebaldeko Saharan. Mauritaniarekin muga egiten duen kontrolean eman zion su gorputzari, gasolinarekin. Marokoko militarren kontrako oihuak egin zituen erre aurretik, okupazioa salatuz. Gaztea Marokora eraman zuten eta zaintza berezietan izan dute gaur arte. Casablancako Ibn Ruchd ospitalean hil da gaur goizaldean. 

Gaztearen amak salatu du ez diotela semearen gorpua itzuli eta jaioterrira eramatea ukatu diotela. Marokok, isilik egotearen truke dirua eskaini dio sendiari. Dakhla hirikoa da gaztea, eta han lurperatzen badute, hileta protesta ekintza bilaka daiteke. Hiriaren kanpoaldean jada kanpaleku bat ezarri dute gazte sahararrek. Mendebaldeko Saharako hiri nagusietan, berriz, hainbat protesta egiten ari dira. Aaiun hiriburuan manifestariak indarrez sakabanatu dituzte segurtasun indarrek eta hainbat zibil zauritu dituzte, tartean emakumeak. Ekintzaileen etxeak, berriz, inguratuta dituzte militarrek azken egunotan, haien kontrako jazarpena etengabea baita.

Aljerian errefuxiatuta dauden sahararrek ere elkarretaratzeak egin dituzte gaur goizean lurralde okupatuetan, harresiaren beste aldean bizi diren sahararrei elkartasuna adierazteko. Tindufen milaka lagun atera dira kalera okupazioa salatzera eta preso politikoen askatasuna aldarrikatzera. Fronte Polisarioko hainbat ordezkarik ere hartu dute parte protestetan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna