Kataluniako Generalitateko presidente Quim Torraren aurkako salaketa aurkeztu du Kataluniako Fiskaltzak, desobedientzia egotzita. Leporatzen diote Hauteskunde Batzorde Zentralaren aginduei entzungor egitea, Generalitateko eraikinetatik preso politikoen aldeko xingola horiak eta pankartak ez kentzeagatik.
Espainiako hauteskunde batzordeak ikur horiek kentzeko eskatu zion Generalitateari martxoaren 11n; 48 ordu eman zizkion. Generalitateak martxoaren 22an kendu zituen xingola horiek, arartekoaren aholkuari jarraituz, eta, haien ordez, xingola zuriak eta adierazpen askatasunaren aldeko pankartak jarri zituen. Ondorioz, Espainiako Fiskaltza Nagusiak Kataluniako Fiskaltzari eskatu zion iker dezala Quim Torra, argitzeko ea desobedientzia deliturik dagoen Torrak eraikin publikoetatik ikurrak garaiz —eskatu ziotenean— ez kentzeagatik.
Xingolak kendu dituzten arren, Torrak komunikatuan herritarrak gonbidatu eta "animatu" zituen etxeetako balkoiak xingola eta bandera horiekin "betetzera". Presidenteak nabarmendu zuen ez duela "atzerapausorik" emango adierazpen askatasunaren defentsan, eta prest dagoela jokabide horren ondorioak "onartzeko".
