Ciudadanosek eta PPk Carles Puigdemonten hautagaitzaren kontra jarritako helegitea aintzat hartu du Espainiako Hauteskunde Batzordeak, eta ezabatu egin du haren hautagaitza Junts per Catalunyak —Lliures por Europa izenarekin— aurkeztu duen zerrandatik. Neurri bera hartu du Puigdemonten gisan erbestean diren Cominekin eta Ponsatirekin ere.
Helegitean jaso zutenez, Ciudadanosek eta PPk argudiatu dute Puigdemontek ez dituela hautagai izateko baldintzak betetzen, hautatuak izanez gero, ezin izango lituzketelako beren gain hartu hautagai gisa egokituko litzaizkieken ardurak. Horrez gain, PPk eta Ciudadanosek adierazi dute Puigdemontek, Cominek eta Ponsatik ezin dutela ez hautagai ezta hautatu ere izan, ez direlako ageri Espainiako Estatutik kanpo bizi direnen hauteskunde erroldan.
Hauteskunde Batzordeak ez du zehaztu zertan oinarritzen duen hiru politikari kataluniarren hautagaitza indargabetzeko erabakia. Jakinarazi du kaltetuei datozen orduetan helaraziko zaizkiela erabakiaren arrazoiak.
Puigdemontek, Ponsatik eta Cominek adiministrazioarekiko auzi helegitea aurkezteko aukera izango dute. Bi eguneko epea izango dute horretarako, Europako hauteskundeetarako hautagaitzak Espainiako Buletin Ofizialean argitaratzen diren egunetik zenbatzen hasita.
