Jokin Altuna, buruz buruko txapelduna, lehiaketatik kanpo geratu da final laurdenetan. Iker Irribarriak gain hartu zion atzo, 18-22. Partida bizi eta lehiatua izan zen hasiertik: Irribarriak aurretik hasi arren, azkar eman zion buelta Amezketakoak (5-1). Sakea berreskuratu, eta berriz ere aurrea hartzea lortu zuen Aramakoak (5-9), baina berriz ere estu hartu zuen Altunak (9-9).
Lan erdietara berdinduta iritsi ziren bi pilotariak (11-11), eta Altunak lau tantoko aldea ere atera zion une batean Irribarriari (16-12). Hortik aurrera, Irribarriak hartu zuen partidaren kontrola, 16-20 jarri arte. Altunak ez zuen etsi, baina azkenean, Aramakoak egin zuen aurrera (18-22). Horrenbestez, finalerdietan da Irribarria; Elezkano eta Peio Etxeberriaren arteko partidako garailearen aurka jokatuko du.
Gaur, Ezkurdiak eta Jakak jokatuko dute final laurdena (18:45). Bengoetxearen eta Urrutikoetxearen txanda izango da bihar (18:00), eta astelehenean izango da Elezkanoren eta Peio Etxeberriaren artekoa.