Logroñon (Espainia) dago preso Oier Urrutia, eta beste askotan bezala hura bisitatzera joan da haren lagun bat asteburu honetan. Baina ezbeharra izan du espetxera iritsi aurretik. Goizeko 10:30ak inguruan gertatu da istripua. Autobideko ordainlekua igaro eta berehala beste ibilgailu batek jo dio atzetik Urrutiaren lagunaren kotxeari.
Kolpearen ondorioz, autoko atzeko gurpiletako bat lehertu egin da; hala ere, Urrutiaren laguna onik irten da. Baina ezin izan dio euskal presoari bisita egin.
Etxeratek salatu du sakabanaketak eragindako bosgarren istripua izan dela asteburu honetakoa. "Ez dago arrazoirik euskal preso guztiak Zaballara ez hurbiltzeko, eta gaixo dauden eta adin nagusikoak diren presoak ez askatzeko", adierazi du elkarteak komunikatu batean.
Bide batez, gertatutakoa salatzeko elkarretaratzeak antolatu dituzte datozen egunetan Hego Euskal Herriko lau hiriburutan.
