Urrutikoetxearen atxiloketa

"Bake prozesua saboteatu" nahi dutela salatu du EH Baik iluntzeko protestetan

 
Baionako elkarretaratzea.
Baionako elkarretaratzea. EH Bai. Tamaina handiagoan ikusi

Berria -

2019ko maiatzak 16

"Frantziako eta Espainiako estatuek atxiloketa honekin erakusten digute bake prozesua saboteatu nahi dutela". Anita Lopepe EH Bairen bozeramaileak "fermuki salatu" du Josu Urrutikoetxearen atxiloketa, Baionan egindako elkarretaratzean. "ETAren disoluzioaren urtemugaren biharamunean honelako gertakari bat ulergaitza zaigu. Urrutikoetxea eta beste bi lagunak berehala aska ditzaten exijitzen dugu". Baionan ez ezik, Donibane Garazin eta Maulen ere egin dituzte bilkurak.

Izan ere, EH Baiko kideek nabarmendu dutenez, Urrutikoetxeak "paper aktibo bat izan du azken urteetan eraikitako bake prozesuan, elkarrizketaren bitartez irtenbide politikoa bilatuz gatazka politikoari. Bakearen apustuaren aldeko erreferente nagusietariko bat izan da ETAn". Horren adibide gisa, desegitea iragartzeko agiria ere berak irakurri zuela gogorarazi dute.

Atxiloketa "erabaki politikoa" izan dela kritikatu du Lopepek, eta ohartarazi du "oraindik ere badela gatazka eta bere konponbidea etekin politikoa eta elektorala erdiesteko helburua duenik". Hala, Miramar jauregian EH Bildurekin batera egindako adierazpena gogora ekarriz, berretsi du "konpromisoa eta ardura" hartu dutela "bakea zein bizikidetza demokratikoa eraikitzeko".

Larunbatean, manifestazioa

Sortuk ere elkarretaratzera deitu ditu herritarrak, arratsalderako, atxiloketa salatu eta "bakearen eta askatasunaren aldeko apustu irmoa" berresteko. Horra, esaterako, Iruñean, Larrabetzun (Bizkaia) eta Oiartzunen (Gipuzkoa) egindako protestak:

Larunbaterako, berriz, manifestazio batera deitu du Sortuk Ugaon (Bizkaia), 18:30ean, Urrutikoetxearen jaioeterrian. Bakea eta askatasuna irabaztera, Josu eta besteak askatu lelopean egingo dute mobilizazioa.

Azkenik, maiatzaren 26ko bozetan EH Bildu bozkatzera deitu du, "bakearen eta askatasunaren aldeko apustua" babesteko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna