Hezkuntza

Dena prest dute Errenterian Euskal Eskola Publikoaren jairako

Ekainaren 2an egingo dute EHIGE gurasoen elkarteak ikastetxe publikoekin elkarlanean antolatzen duen jaia, Errenterian. Makina bat taupada leloa aukeratu dute aurten. Ikusi bideoklipa albistearen amaieran.

Euskal Eskola Publikoaren jaiaren aurkezpena, gaur, Errenterian.
Euskal Eskola Publikoaren jaiaren aurkezpena, gaur, Errenterian. Arantxa Iraola

Berria -

2019ko maiatzak 23

Errenteriaren (Gipuzkoa) izaera aintzat hartuta, industrializazioari garrantzia eman nahi izan diote aurten Euskal Eskola Publikoaren jaiaren antolatzaileek, "herriko bereizgarri" dela iritzita. Horri lotuta prestatu dute Makina bat taupada leloa, eta pertsonaz osatutako engranaje bat aukeratu dute irudi modura. Gaur Errenterian egindako agerraldian azaldu dutenez, ohi bezala, "euskal eskola publikoa aldarrikatzea" izango da festaren helburua. 28. edizioa du, eta lehenengo aldiz egingo dute Oiartzualdean. Hainbat gunetan banatuko dute herria, egitarau zabalarekin.

Antolatzaileekin batera, Julen Mendoza alkatea izan da gaurko aurkezpenean, eta EIHGE guraso elkarteak egindako lana nabarmendu du. "Gure herria anizkuna da" oroitarazi du, eta azaldu du jaia ona izan daitekeela euskara, aniztasuna eta hezkuntza eredu berri bat aldarrikatzeko. Porrotx pailazoa ere izan da gaur Errenterian, eta haurrez inguratuta amaitu dute agerraldia.

Ohi bezala, garraio publikoa erabiltzeko deia egin dute antolatzaileek. Trenen eta autobusen ordutegiak eskuragarri jarri dituzte horretarako. Renfen zein Euskotrenen, orduerdiro egongo dira trenak, eta eskola askotatik autobusak antolatuko dituzte.

Iaz, Lekeition (Bizkaia) egin zuten Euskal Eskola Publikoaren jaia.

Horra aurtengo bideoklipa:

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna