Lurralde desorekak gehien pairatzen dituzten herrien geroa bermatzeko asmoz, Udalbiltzak eta Koop57k tokiko garapenarekin loturiko ekinbideak sustatuko dituzte, bertako herritarren aukerak errazteko xedearekin. Hala, elkarlanerako esparrua finkatu dute Udalbiltza Partzuergoak eta Koop57 irabazi asmorik gabeko kooperatibak, "finantza etiko eta solidarioen bidez Euskal Herriak dituen lurralde desorekak arintzeko helburuarekin". Lankidetza hitzarmena sinatu dute Luis Intxauspe Udalbiltzako lehendakariak eta Gorka Julio Koop57ko ordezkariak, gaur, Andoainen (Gipuzkoa), Martin Ugalde kultur parkean.
Zailtasun handienak bizi dituzten eskualdeetan tokiko garapenarekin loturiko ekinbideak aztertu eta gauzatzeko indarrak batu nahi dituzte bi erakundeek, betiere ekonomia sozialaren esparruan.
Lankidetza hitzarmenak lau urteko epea izatea aurreikusi dute.
