Bastidako EH Bilduk sare sozialetan argitaratutakoaren arabera, koalizioak kontaktuak izan ditu EAJrekin eta PPrekin, eta biek ala biek eskaintzak egin dizkiote koalizioari haren babesa lortu nahian alkatetza eskuratzeko. Lau zinegotzi ditu PPk, EAJk hiru, eta EH Bilduk bi zinegotzi ditu; hortaz, EH Bilduren botoak erabakigarriak izango lirateke alkatea izendatzeko.
Sare sozialetako mezu horren arabera, PPk EH Bilduri proposatu dio bi udal sail koalizioaren esku uztea, eta horren programan agertzen diren zenbait neurri bere egitea, Bastidako EH Bilduk oraindik ez ditu eskaintza horiek baloratu. BERRIAri azaldu diotenez, ez dute inolako konpromisorik hartu, eta bihar batzarra egingo dute erabaki bat hartzeko.
Horren aurrean, Arabako PPren zuzendaritzak argi utzi nahi izan du ez duela begi onez ikusten "EH Bildurekin izandako edozein kontaktu, edo etorkizunean egon zitezkeenak", eta berretsi du Bastidan "eta Arabako gainerako herrietan" ez dagoela akordiorik EH Bildurekin, "ezta egongo ere".
Arabako PPren presidente Iñaki Oiartzabalek esan duenez, "jarrera hori koherentea da beti defendatu dugunarekin. EH Bilduren egitasmoa antagonikoa da, eta ez da bateragarria PPk defendatzen dituen balioekin".