Berri Txarrak taldeak uztailaren 14an Bilboko Kobetamendin egingo duen kontzertu berezian —Lagun Artean izena izango du—, hamabost gonbidatuk parte hartuko zutela iragarri zuen taldeak joan den maiatzaren 14an Bilbon eginiko agerraldian. Orduko hartan jaialdian parte hartuko duten bost artistaren berri eman zuten —Iñai Altolagirre Matxet (Sega Sound Killers), Leire Iseo (Iseo & Dodosound), Aiora Renteria (Zea Mays), David Ruiz (La M.O.D.A) eta Enrique Villarreal El Drogas.
Gaur jakinarazi du Last Tour kontzertuaren antolatzaileak gainerako artisten izenak: Anari Alberdi, Broken Brothers Brass Band, Facu Díaz aurkezle eta umorista, Jurgi Ekiza (Willis Drummond, Ekiza), Ricky Falkner (Egon Soda, Love of Lesbian), Aitor Gorosabel (Su Ta Gar), Toni Mejías (Los Chikos del Maíz, Riot Propaganda), Aritz Mendieta (Deaburak Teilatuetan), Karlos Osinaga Txap (Lisabö), Martí Perarnau IV (Mucho) eta Nerea Urbizu (Kantamalo, Ene Kantak).
FanZone gunean hainbat ekitaldi eta ekintza egingo dira 16.30ean hasita, eta Ahotseneak programatutako kontzertu sorta ere egingo dute gune berean.