Espainiako Auzitegi Nazionalak baztertu egin du Ahotsa.info hedabideari "terrorismoa goratzea" egozten zion salaketa. Espainiako Poliziak jarri zuen, hedabideak 2018ko bi albistetan "euskal preso politikoak" esamoldea erabili zuela eta. Auzitegiak ebatzi du esmolde horrek ez duela terrorismoa goratzen, ezta biktimak beheratzen ere, eta adierazpen askatasunak babesten duela haren erabilera.
Salaketak behartuta, Ahotsa.info elkarteko presidenteak Auzitegi Nazionalean deklaratu behar izan zuen, eta epaimahaiaren aurrean hedabidearen jarduna eta adierazpen askatasuna defendatu zituen.
Ahotsa.info-k salatu du Espainiako Poliziaren salaketaren helburua hasieratik izan dela hedabidearen lana oztopatzea. "Beste behin, agerian gelditu da Polizia espainiarrak hedabide honekiko duen obsesioa", adierazi dute agerkariaren webgunean. "Deliturik ez zuten albisteak erabili dituzte Ahotsa.info kriminalizatzeko, gure jarduna baldintzatzeko eta beldurtzen saiatzeko". Hedabideak berretsi du lanean jarraituko duela, baita "euskal presoek eta beraien senideek pairatzen dituzten eskubide urraketak salatzen" ere.
