2030 Agenda

Autogobernua "ongizate eredua" dela esan du Iñigo Urkulluk New Yorken

Eusko Jaurlaritzako lehendakariak parte hartu du NBE Nazio Batuen Erakundeak antolaturiko HLPF Goi Mailako Foro Politikoan.

Iñigo Urkullu Jaurlaritzako lehendakaria, gaur, Nazio Batuen Erakundean.
Iñigo Urkullu Jaurlaritzako lehendakaria, gaur, Nazio Batuen Erakundean. IREKIA

Gotzon Hermosilla -

2019ko uztailak 15

Bere hitzaldian, 2030 Agendari eta GJH Garapen Jasangarritako Helburuei loturiko proiektuak aurkeztu ditu Urkulluk. Esan duenez, "Euskadi aitzindaria" izan da Europan helburu horiei atxikitzen eta ezartzen, eta horren adibide gisa Euskadiko Bonu Jasangarrien esperientzia azaldu du Foroan.

Esan duenez, bonuek "harrera ona" izan dute, eta horien bidez 2030 Agendari lotutako gizarte eta ingurumen proiektuak finantzatzen dira. "Euskadiko Bonu Jasangarrien esperientziaren bidez, 2030 Agendari lotutako proiektuen finantzaketa bermatzeko funtsezko hiru faktore nabarmendu ditzakegu: kaudimena, gardentasuna eta sinesgarritasuna", esan du Urkulluk.

"Euskadi balioetan oinarritutako herria da", erantsi du, eta nabarmendu du balio horiek bat datozela Garapen Jasangarrirako Helburuek ezarritakoekin. "Erakutsi dugu autogobernua ongizatearen sinonimo dela; jarraituko dugu mundu berdinzaleagoa, jasangarriagoa, solidarioagoa eta bidezkoagoa erakitzeko konpromisoari lotuta".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna