Altxamendu frankistaren 83. urteurrenean, "frankismoaren biktimentzako egia, justizia eta erreparazioa" eskatu dituzte Gasteizen. Iragana Gogoan, Araba berria eraiki. Inpunitate frankistaren kontra: egia, justizia eta erreparazioa lelopean, ekitaldi bat egin dute Agirre Lehendakaria kalean, EH Bilduk, Ahal Dugu-k Ezker Anitzak eta Equok antolatuta. Hala, adierazi dute "lehen eta bigarren mailako biktimak sailkatuko ez dituen herri bat" eraiki nahi dutela, "ez errepikatzeko bermeekin" batera.
Hirugarren urtea da alderdi horiek ekitaldi bateratua egiten dutena, eta nabarmendu dute "altxamendu frankistak eta diktadurak zapuztu zuten jendarte justuagoa eraikitzen hasi zirenen lekukoa" hartu nahi dutela. Gogora ekarri dute, besteak beste, gizonen eta emakumeen arteko berdintasuna, hezkuntza publikoa, eskubide sozialak eta estatuaren eta Eliza katolikoaren arteko banaketa defendatu zituztela garai hartan: "Gaur egun, balio horiek guztiak indarrean daude".
Gogora institutuak egindako txosten bateko datuak ere jakinarazi dituzte. Haren arabera, 1936 eta 1945 artean gutxienez 60 lagun hil zituzten bonbardaketetan, 198 epaiketarik gabeko exekuzioetan, 30 epaiketa bidezko exekuzioetan, eta 289 espetxean. "Pertsona horiek guztiak gizateriaren kontrako krimenen biktima izan ziren. Haiei gehitu behar zaizkie borrokan hildako beste 593 miliziano".
20:00etan, elkarretaratzea
Iluntzean, elkarretaratzea egingo dute Katedral Berriaren ondoan, 20:00etan. Izan ere, "frankisten eskutik" katedrala inauguratu zuteneko 50. urteurrena beteko da aurten.
Argentinako Kereilako Euskal Plataformak ere bat egin du ekitaldiekin. "Eskuin muturrak eta frankismoa goratzen duten jarrera erreakzionarioek gora egin duten honetan, uste dugu inoiz baino beharrezkoagoa dela alderdi eta erakunde demokratikoen erantzun bateratua, gizarte zibilarekin batera, aurrerakada hori gelditu eta aurre egiteko".
