"Krimenik izugarrienak egin dituzten bost preso horien biktimei justizia egingo zaie". Hala argudiatu du William Barr AEBetako fiskal nagusiak, maila federaleko beste hainbat auzitan errugabetzat jotako bost presori heriotza zigorra ezartzeko erabakia. AEBetako auzitegi federal baten aginduz hildako azken presoa Louis Jones izan zen, 2003an. Geroztik, soilik zigor hori indarrean duten estatuetako auzitegiek hartu dituzte halako erabakiak.
Heriotza zigorraren gaineko moratoria, haren aurkako protestek eragin zuten. Barack Obamaren legealdian, gainera, injekzio hilgarria jartzeko protokoloa bera ere aztertu zen. Baina Barrek berak gogorarazi duenez, AEBetako Kongresuak onesten du maila federaleko auzietan heriotza zigorra ezarri ahal izatea. "Bi alderdien agintaldietan kriminalik okerrenei ezarri zaie heriotza zigorra", adierazi du fiskalak.
Datorren abendua eta urtarrila bitartean hilko dituzte bost presoak. Zigortutakoen artean dago Daniel Lewis Lee, eskuin muturreko talde arrazista bateko kidea, eta hiru pertsonaren hiketagatik espetxeratua. "Biktimei eta haien familiei zor diegu", esan du Barrek.
1976tik dago indarrean heriotza zigorra AEBetan, baina soilik estaturik kontserbadoreenetan ezarri ohi dute. Maila federaleko auzietan ez da ohikoa izaten akusatuak hiltzera zigortzea, eta 1988tik hiru preso hil dituzte, horietatik azkena Jones, 2003an.
