"Herriak izan behar du hitza". Hori adierazi dute G7 Ez eta Alternatives G7 plataformek. Goizeko hamaiketan bildu dira, Hendaian, hilaren amaieran Miarritzen egingo den G7koen gailurraren aurkako kontragailurrari buruzko argibideak emateko. G7koen gailurra salatu dute "Euskal Herriko dinamikak trabatzeagatik eta munduko ezberdintasunak sustatzeagatik". Hala, antolatzaileek kontragailurra antolatu dute, eta Irungo Ficoban eta Hendaian antolatu dituzten jardueren berri eman dute; hilaren 21etik 23ra bitartean egingo dituzte.
Askotariko ekintzak izango dira. Egoitz Urrutikoetxea antolatzailearen esanetan, "Berrogei hitzaldi osorik itzuliko dira euskaraz, frantsesez, gazteleraz eta ingelesez. Ia berrehun hizlariren presentzia izanen dugu, baita 50 tailer ere, zazpi gai orokorren inguruan". Adierazi dutenez, egitaraua Euskal Herriko errealitatean sustraitua da, "frantses presidentetzak inposatu G7koen kontra altxatu diren elkarte eta sindikatu anitzen borroka lurraldean". Landuko diren gai horien artean izango dira, besteak beste: kapitalismoa, klima eta ingurumena, feminismoa, herrien aniztasuna eta askatasuna, demokrazia soziala eta autoritarismoa, elkartasuna gerlen eta inperialismoaren aurkako borrokan eta migrazioa eta harrera.
"Euskal Herriko plazak eta herriak pribatizatuak eta bunkerizatuak agertuko dira, G7 goi bilerako ordezkariek lasaitasunez haien jarduerak burutu ditzaten", salatu dute. Horregatik, kontragailurrarekin bat egiteko eta antolatu dituzten jardueretan parte hartzeko deia egin dute antolatzaileek: "Lasaitasunez eta erabakitasunez ariko gara, eraikuntza eta erresistentzia jarrerarekin. Ez dugu deus suntsituko, eta indarkeriarik gabeko metodoak erabiliko ditugu". Lasaitasun hori bermatze aldera, agenteak haien mobilizazio inguruetatik aldentzea galdegin dute, eta kezka adierazi dute manifestarien aurka poliziek izan lezaketen jarrera oldarkorragatik: "Emmanuel Macronen gobernuak oposizio manifestazioen kontra egiten duen kudeaketa bortitzak kezkatzen gaitu."
"Mundua suntsitzen duten arkitektura neoliberala eta zapalkuntza sistema desberdinak desegiteko xedez" prestatu dute ekinaldia. Irungo Ficoban eta Hendaian izango dira ekintza horiek, eta garraio sistema berezia jarriko dute martxan toki batetik bestera joateko. Adierazi dutenez, egitaraua osatzen ari dira oraindik, erakundeek antolatzaileak jakinarazi ahala gehitzen baitira jarduerak. Halaber, laster finkatuko dituzte toki eta tenore zehatzak ere. G7 Ez plataformaren webgunean irakur daitezke kontragailurraren egitarauaren eta gainerako deialdien xehetasunak.
"Plangintza on bat"
Aitzitik, gailurraren aurka antolatu diren ekintza horiei guztiei aurre egiteko plangintza on baten beharra azpimarratu dute erakundeek. Hori galdegin dio, hain justu, Aitor Otxoa Ertzaintzaren Erne sindikatuko Gipuzkoako idazkariak Segurtasun Sailari. Goi bileraren harira gerta daitezkeen istiluen aurrean Ertzaintzaren "baliabide guztiak" erabili ahal izateko deia egin du. Halaber, Ertzaintzaren "erantzuteko gaitasuna" azpimarratu du. Gerta daitekeen guztiari aurre egiteko prest, eskura dituzten baliabide guztiak erabil ditzatela galdegin du, istiluak aurreikusi eta horiek ahal den neurrian saiheste aldera.
Era berean, beste herrialde batzuetan izaniko gailurrak gaitzesteko egin izan diren ekintzak ekarri ditu gogora. Idazkariaren esanetan, askotarikoak izan dira gertaera horietan izan diren sabotajeak eta istiluak; beraz, Frantziako Poliziak muga igarotzeko garaian neurri garrantzitsuak jarriko dituela ziurtatu du. Aitortu du hara hurbiltzen diren guztiak muga igaro ezinik gelditu daitezkeela neurri zorrotz horiek direla eta. Hain justu, Eneko Goia Donostiako alkatea muga ixtearen beldur agertu da. Horregatik, Goiak ziurtatu du "kontingentzia plan bat" aurreikusi dutela, hori gertatzen bada erantzun azkar bat eman eta bertan gelditu diren herritarrek irtenbide bat izan dezaten.
Estefania Beltran de Heredia Eusko Jaurlaritzako Segurtasun sailburuak ere egin ditu adierazpenak. Sailburuaren arabera, 4.000 ertzainek –lantalde osoaren erdia– hartuko dute parte G7koen goi bileraren harira antolaturiko dispositiboan, eta trafikoa izango da goi bileraren ondoriorik handiena. G7koen gailurraren aurka antolaturiko kontragailurraren harira, bestalde, Beltran de Herediak adierazi du espero duela ez egotea istilurik, eta jarduera horiei dagokien segurtasun zerbitzua ezarriko dela. Halaber, agenteen jarduna Gipuzkoako mugaz bestalde gertatzen denaren menpe egongo dela adierazi du, eta oso garrantzitsua izango dela "segurtasun indar desberdinen arteko koordinazio lana".
