Ingurumena

Erdiz inguruan egin nahi duten magnesita harrobiak ekar ditzakeen arazoez ohartarazi dute

Sustrai Erakuntzak esan du proiektua egiten bada "hondamendia" eragingo duela ingurumenean, eta kontra egitera deitu du.

Harrobia egin nahi duten lekua. /
Harrobia egin nahi duten lekua. / Sustrai

Arantxa Iraola -

2019ko abuztuak 20

"Proiektuaren asmoa da ia ehun hektareatan eragina izatea; horietako 53 inguru abeltzainentzat kalitate handiko larreak dira, beste hamar inguru, pagadiak. Horiek betiko galduko lirateke". Sustrai Erakuntzak aski balorazio ezkorra egin du Magnesitas Navarra SA enpresak Erdiz inguruan (Nafarroa) magnesita harrobi bat martxan jartzeko egin duen egitasmoaren inguruan. Esan du harrobia egiten bada eremu babestu bat hondatuko duela, Alduide mendi ingurukoa.

Gogora ekarri du inguru horretantxe egin nahi zutela aurretik ere beste antzeko egitasmo bat, Zilbetiko lurretan, baina egitasmo horrek ezin izan zuela aurrera egin auzitegietan. 2015ean, Nafarroako Justizia Auzitegi Nagusiak ebatzi zuen egitasmoa atzera bota behar zela; sententzia haren arabera, Natura 2000 sareak «kalte onartezina» eginen luke eremu babestu batean, eta ezin zen egin. 2017an, Espainiako Auzitegi Gorenak berretsi egin zuen epai hori.

Harrobiko jardunaren ondorioz zabalduko diren hautsek kutsadura eragingo dutela, harrobira joan-etorrian ibiliko diren kamioi ugariek ere kaltea eragingo dutela, inguru hartan ari diren artzainei eragozpenak sortuko dizkiela beren jardunean jarraitzeko... Egitasmoa auzitan jartzeko motibo asko zerrendatu ditu Sustrai Erakuntzak. "Atzera-bueltarik gabeko kalteak" izango liratekeela esan du, inguruko ekosistemak guztiz hondatuko lituzkeela, eta kontra egin behar zaiola. Erdiz Bizirik plataforma ari da horretarako bideak aztertzen, eta lehengo hilean bertan mobilizazioak egiten hasi zen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna