MEMORIA

Plaka itzuli diote Gogoan monumentuari

Azken asteetan hiru aldiz egin diote eraso monumentuari.

Ekitaldia egin dute Gogoan monumentuaren aurrean, hari plaka berriro jartzeko.
Ekitaldia egin dute Gogoan monumentuaren aurrean, hari plaka berriro jartzeko. Iñigo Uriz / Foku

Jon O. Urain -

2019ko abuztuak 29

Plaka itzuli diote 1978ko sanferminetako gertakariak oroitzen dituen Gogoan monumentuari. Uda honetan hiru aldiz egin diote eraso, eta beste hainbeste alditan jarri diote ebatsitako plaka. Gaur, ekitaldi bat egin dute 19:00etan monumentuan bertan, 78ko Sanferminak Gogoan elkarteak deituta, plaka berria jartzeko. Bertan, mezu bat: 1978ko sanferminetan pairatutako polizia erasoaren biktimen oroipenean.

Ekitaldian izan dira, besteak beste, Unai Hualde Nafarroako Parlamentuko lehendakaria, Maria Solana Geroa Baiko parlamentari eta gobernuko bozeramaile ohia eta Bakartxo Ruiz EH Bilduko bozeramailea.

Lehenbiziko erasoa uztailaren 22 eta 25 artean gertatu zen. Orduko hartan, Gogoan monumentuaren plaka ebatsi zuten. Uztailaren 27an, elkarretaratze bat izan zen, 78ko Sanferminak Gogoan plataformak deiturik, eta behin-behineko kartel bat paratu zuten, jatorrizkoaren mezu berarekin.

Abuztuaren 13an, behin-behineko afixa hautsi zuten, eta txakur gorotz batzuk utzi zituzten haren gainean. Plataformako kideek beste kartel bat paratu zuten orduan, orain desagertu dena.

Dora Salazar artista altsasuarrak egindako eskultura bat da Gogoan. Emakume baten gorputz biluzia ageri du, bururik eta besorik gabekoa. 78ko Sanferminak Gogoan plataformak bultzatutako egitasmoa izan zen, herritar askok diruz lagundutakoa. Iazko ekainaren 28an inauguratu zuten monumentua, "1978ko sanferminetako polizien erasoen biktima guziak gogoratzeko".

Urte hartako uztailaren 8an, Espainiako Polizia Armatua zezen plazan sartu eta han zirenei oldartu zitzaien. Istiluak kanpora hedatu ziren; poliziek suzko armak erabili zituzten, eta tiro haietako batez hil zuten German Rodriguez LKIko militantea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna