Bihar, igandez, irtengo dira Hondarribiko kaleetara Jaizkibel Konpainiako kideak, eta ohiko orduan egingo dute desfilea, nahiz eta Udalak eta alarde tradizionalekoak bestelako asmoak izan. Alarde parekidekoek aurrez eskatua zuten desfilatzeko baimena Segurtasun Sailean, eta haiek onartu egin zieten. Bihar, beraz, 07:55ean abiatuko dira Kale Nagusian gora.
Hain zuzen, Hondarribiko Emakumeak plataforma izan da ordutegi aldaketa eskatu dutenetako bat. Elkarteak oharra plazaratu du Segurtasun Sailari egotziz "konfrontazioa sustatzen eta krispazio eta biolentzia goera areagotzen duen ordutegi bat inposatu" izana. Hori ikusirik, diote eurak prest agertu zirela "euren defentsa eta babesa diren plastiko beltzak" kentzeko, betiere ordutegian aldaketak eginez gero.
NAHIKOA DA!
— Jaizkibel Konpainia (@Jaizkibel6) September 7, 2019
Hondarribiko Emakumeak plazaratu berri duten proposamena, ez da proposamen bat. Mehatxu bat da. Jaizkibel K. ordutegia aldatzen ez badu, beraiek plastiko beltzak jarriko dizkigutela.
Proposamen bitxia da hau, ez gaituzte erasotuko baldin eta gu desagertzen bagara. pic.twitter.com/CUUCKf2869
Jaizkibel konpainiak, ordea, gogorarazi du plastiko beltzak debekatu egin zituela bere garaian Segurtasun Sailak. Alarde parekidearen aldekoek mehatxutzat jo dute Hondarribiko Emakumeak plataformaren oharra. "Bitxia da proposamena. Gu desagertzen bagara, ez dituzte [plastiko beltzak] jarriko. Eskertzen diegu publikoki onartu izana urak direla plastiko beltzak eta haiekin lotutako ekintzak antolatzen dituztenak".
Alkateen —jeltzaleak izan dira Hondarribian gatazka hasi zenetik— sostengurik ez du inoiz izan Jaizkibelek, eta kanpotik joandako politikariek hauspotu behar izan dute usu haien jarduna, beti ondoan izan dituzten Emakunde eta Arartekoko ordezkariekin batera. Oraingoz, aurtengorako, PSE-EE, EH Bildu eta Ahal Dugu-k iragarri dute ordezkaritza zabala Kale Nagusian.
