Kataluniako prozesuaren aurkako sententziaren atarian, "eskubide indibidual eta kolektiboen aldeko defentsa aktiboa egiteko konpromisoa" transmititu dio Gure Esku dinamikak gaur Quim Torra Kataluniako Generalitateko presidenteari, Bartzelonan egin duten bileran. Kataluniako eta Euskal Herriko egoera politikoak aztertu dituzte.
Gure Esku prest agertu da preso katalanen inguruan zigor epaia izanez gero "euskal gizartearen erantzun zabala artikulatzeko". Uste du ezinbestekoa dela euskal herritarren ordezkariek ahaleginak areagotzea oinarrizko eskubideak, askatasunak eta burujabetza nahia elkarrekin defendatzeko.
ANCk gonbidatuta, Diadako manifestazioan parte hartuko du Gure Eskuk, eta datozen egunetan bilerak egingo ditu Roger Torrent Kataluniako Parlamentuko presidentearekin, ANCko lehendakari Elisenda Paluzierekin eta Omnium Culturaleko Zuzendaritza Batzordeko ordezkaritza batekin.
Independentistak Sarearen martxa
Independentistak Sareak Diadaren arratsaldeko mobilizaziorako martxa egin du, Bartzelonako Euskal Etxetik abiatuta. Txutxi Ariznabarreta sareko bozeramaileak azaldu duenez, Diadan parte hartzen duten euskal herritarrek Kataluniako mugimendu independentistari "elkartasuna eta konplizitatea" adierazteko antolatzen dute martxa. "Euskal Herritik gatozenok denok batera erakusteko, indartsuago, gure elkartasuna; eta denok betera parte hartzeko Diadan".
[youtube]https://youtu.be/orBQ-CB722A[/youtube]
