Kataluniako epaiketaren epaia

Irrati bat, oinetako erosoak, janaria eta ura, mobilizaziorako

Aste honetan edo hurrengoan aterako da Kataluniako buruzagi independentisten kontrako epaiketaren epaia, eta eragileak antolatzen ari dira erantzuteko.

CDRetako kide bat, Espainiako polizia baten aurrean, protesta batean pasa den astean.
CDRetako kide bat, Espainiako polizia baten aurrean, protesta batean pasa den astean. Alejandro Garcia/EFE

Jon Ordoñez Garmendia -

2019ko urriak 8

Tsunami Demokratikoa du izena, eta azken orduetan handitzen ari da olatua. Telegramen geroz eta harpide gehiago dituen kanal horrek gida labur bat egin du Kataluniako erreferendumaren auziko epaiketa ateratzen denerako. Espainiako Auzitegi Gorenaren epaia aste honen amaieran edo datorrenaren hasieran aterako da, eta eragile guztiak ari dira prestatzen horri erantzuteko. Honela dio gidak:

"Zer eraman behar duzu?

Irrati bat, oinetako erosoak eta eguna etxetik kanpo pasatzeko janaria eta ura.

Bartzelonatik kanpo bizi zara?

Presta zaitez autoa edo garraio publikoa hartzeko. Azkar mugitu beharko duzu.

Zer egin dezaket epaia ateratzen den bitartean?

Azaldu zure ingurukoei Tsunami Demokratikoa epaiari erantzuteko erantzun masibo eta bateratua antolatzen ari dela".

Ez dira horiek bakarrik, Ernic Homsek gaur jakinarazi duenez, defentsek —Forn, Turull eta Rullen abokatu da auzi honetan— prest baitute helegite bat Gorenak auzipetuen aurkako epaia ateratzen badu aurkezteko. "Gure aurkakoa bada, auzia ez da hemen amaituko", esan du, eta esan du bide judizialean azkeneraino joateko asmoa.

Intersindical-CSC sindikatuak ere astebetez atzeratu du ostiral honetarako deitua zuen greba deialdia. Gaur joan dira sindikatuko ordezkariak Kataluniako Lan Departamentura deialdia aldatzera, eta, hango iturriek jakinarazi dutenez, epaia jakinaraziko duten egunarekin du zerikusia aldaketak. Greba egiteko arrazoien artean arlo ekonomikoari eta sozialari dagozkionak daude, lan erreforma indargabetzea eta 1.200 euroko gutxieneko soldata ezartzea Katalunian, baina, eguna aldatuta, bat egin dezake epaia jakin ondoren artikula daitekeen erantzunarekin.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna