Iratxe Sorzabal Espainiaratzea onartu du Frantziak

Euskal presoaren tortura salaketa egiaztatua egon arren, Parisko Dei Auzitegiak erabaki du Espainiako Auzitegi Nazionalaren euroagindu eskaera onartzea. Xantiana Cachenault abokatuak iragarri du Kasazio Auzitegira joko dutela.

Xantiana Cachenaut Iratxe Sorzabalen defentsa abokatuak adierazi du helegitea aurkeztuko duela Parisko Dei Auzitegiaren erabakiaren kontra.
Xantiana Cachenaut Iratxe Sorzabalen defentsa abokatuak adierazi du helegitea aurkeztuko duela Parisko Dei Auzitegiaren erabakiaren kontra. Isabelle Miquelestorena

Ekhi Erremundegi Beloki -

2019ko urriak 9

Espainiako Auzitegi Nazionalaren hirugarren euroagindu eskaera da Parisko Dei Auzitegiak onartu duena. ETAk 1995ean Alacanten (Herrialde Katalanak) eginiko atentatu bategatik eskatu zuen Madrilek, presoa Espainian epaitzeko. Xantiana Cachenaut defentsa abokatuaren arabera, Sorzabalek 2001ean Guardia Zibilaren atxiloaldian torturapean egindako adierazpenetan oinarritzen da Madril akusazioa aurkezteko. Dei Auzitegiko fiskala euroagindu eskaera onartzearen alde agertu zen joan den otsaileko auzi saioan, eta epaileak ere ildo beretik jo du. Kasazio Auzitegira joko dutela iragarri du Cachenaultek.

Sorzabalek 2001ean Guardia Zibilaren esku jasandako torturak izan dira aferaren erdigunean. 2015ean atxilotu zutenean, haren tortura salaketak frogatzeko prozedura bat irekitzeko eskatu zion Cachenaultek instrukzio epaileari. Istanbulgo protokoloa aktibatu zioten, eta mediku aditu baten azterketa izan zuen Fresnesko presondegian: "Medikuaren arabera, Sorzabalen tortura salaketak sinesgarritasun osoa du; estres post-traumatikoa antzeman zion", azaldu du abokatuak.

Gaur egun, aukera gutxi daude euroagindu bat ukatua izan dadin, eta legeak aurreikusten ditu. Baina 2016tik aitzina Europako Batasuneko Luxenburgoko auzitegiak beste kasu batzuk ireki ditu, eta jurisprudentziak sortu. Hala, eskaera ukatzeko motibo gisa onartu du euroagindua eskatu duen estatuko espetxe baldintzak tratu txarrekin parekatzea, eta euroagindua eskatu duen estatuko epaileen independentzia falta ere bai. Sorzabalen euroagindua aztertzeko auzi saioan, Luxenburgoko auzitegiari epai aurreko galdera egiteko eskatu zion epaileari euskal presoaren abokatuak. Helburua: euroagindua torturapean egindako adierazpenetan oinarritzea, eskaera ukatzeko motibo gisa onartua izatea. Epaileak ez zuen onartu, eta erabaki du Sorzabalen torturak frogatuak badira ere horrek ez duela aldatzen aferaren mamia, Sorzabalek ez dituelako adierazpen horiek gezurtatu.

Cachenaultek jakinarazi du Parisko Kasazio Auzitegira joko dutela eskaera bera eginez. Hain zuzen ere, epaile batek Luxenburgoko auzitegira jo ala ez erabaki badezake, oso arraroa da estatu bateko auzitegi gorenak Luxenburgokoari galdera egitea ukatzea. Afera azaltzeko, aurki agerraldi publiko bat eginen dutela iragarri du.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna