Indarkeria matxista

Aurrekariak ditu Baionan emaztea hil duelakoan atxilotutako gizonak

Larunbatean, gizonak berak Poliziari hots egin zion, bikotekidea hilda aurkitu zuela esanez: emakumeak ubelduak zituen. Aurten hildako laugarren emakumea da; Lapurdin hiru hilketa matxista izan dira. 2003az geroztik, 102 emakume hil dituzte indarkeria matxistagatik.

Indarkeria matxistaren kontrako manifestazio bat, iazko azaroan, Baionan.
Indarkeria matxistaren kontrako manifestazio bat, iazko azaroan, Baionan. Bob Edme

Garikoitz Goikoetxea -

2019ko azaroak 5

Emazte bat hilik aurkitu zuten larunbatean Baionan, eta hilketa matxista izan dela uste du Frantziako Poliziak. Atxilotu egin dute andrearen bikotekidea. Gizonak berak deitu zuen larunbatean larrialdi zerbitzuetara, emaztea hilik aurkitu zuela eta. Hainbat hedabidek polizia iturriak aipatuz zabaldu dutenez, emaztearen hilotzak ubeldu ugari zeuzkan, eta hilketarena da hipotesi nagusia. Gizona bihar da igarotzekoa epailearen aurretik. Aurrekariak ditu genero indarkeriagatik. Kasua sekretupean dagoela eta, Marc Mariee prokuradoreak ez dio informazio gehiago eman nahi izan BERRIAri. Hildako emazteak 53 urte zituen. Ez dute izenik eman.

Baiona iparraldeko etxebizitza batean aurkitu zuten hilotza, gizonak egindako deiaren ondoren. Emakumearen gorpuak nolako zauriak zituen ikusirik, bikotekidea akusatu zuten poliziek. Hark ukatu egin du hilketa, baina kartzelan sartu dute behin-behinean. Epailearen aurretik pasatuko da ostegunean gizona, eta hark erabakiko du kartzelan segituko ote duen.

Kasua «ohiko indarkeria» gisa ari dira ikertzen. Gogoan izatekoa da indarkeria matxistarekin lotutako kasuak horrela izendatzen dituztela Lapurdin, Nafarroa Beherean eta Zuberoan, Frantziako legediagatik. Atxilotutako gizonezkoak aurrekariak ditu gisa bereko delituengatik. 52 urte ditu.

Lapurdiko hilketak
Indarkeria matxistagatik aurten Euskal Herrian hildako laugarren andrea litzateke Baionan zendutakoa. Azken hilketa Iruñean gertatu zen, abuztuan: 72 urteko andre bat, Alicia Zubiri, laugarren solairu bateko leihotik jausi zen, eta semea kartzelatu zuten, hark bota zuelakoan. Beste bi hilketak Lapurdin gertatu ziren, ekainean: bietan bikotekideak azaldu ziren hilda, eta Frantziako Poliziak uste du gizonek hil zituztela andreak, eta beren buruaz beste egin zutela ondoren. Bardozen gertatu zen hilketa bat; Chantal Joantegi hil zuten, 72 urtekoa. Urruñan izan zen bestea: 81 urteko Mayie Nervi hil zuten. Tiroka hil zituzten biak.

Azken urteetako kopururik apalena da aurtengoa, oraingoz —iaz, bederatzi emakume hil zituzten—. 2003tik hildakoak 102 emazte dira, BERRIAk hilketa matxistei buruz bildutako informazioaren arabera —11 ume ere hil dituzte—.

Lapurdin gertatu dira aurtengo lau hilketa matxistetatik hiru. Ez da aurtengo joera soilik. Indarkeria matxistari buruz BERRIAk jasotako datuek agerian utzi dute proportzioan Lapurdin gertatzen dela hilketa gehien: han hil dute bost emakumetik bat, nahiz eta Euskal Herriko biztanleen %8 bizi diren. Beste datu ezohiko bat ere bada Lapurdin: hilketa matxistak egin dituzten gizonen herenak saiatu dira beren buruaz beste egiten (32 gizon), eta horietatik herenak, Lapurdin (13). Gainerako herrialdeen gainetik dago portzentajea. Urruñako eta Bardozeko hilketek bi baldintzak bete zituzten: Lapurdin gertatu ziren, eta bikotekideak hil ostean beren buruaz beste egin zuten gizonek.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Raiundo Berri taberan izan zirenak PCR proba egiteko zain, Okendu kultur etxean gaur goizean. ©Gorka Rubio/FOKU

500 positibotik gora atzeman dituzte Hego Euskal Herrian

Berria

Atzo baino 119 kasu gehiago izan dira. Ospitaleratzeak areagotu egin dira azken orduetan.

Lasarte-Oriako klasururako konbentua itxita, gaur. ©Javier Etxezarreta / EFE

Lasarte-Oriako klausurako komentu bateko moja guztiek positibo eman dute

Berria

Hamar izan dira positiboak guztira. Alkateak adierazi du agerraldia kontrolpean dagoela.

Kutsatze kopuruen azken datuek gora egin dutela ikusita zientzialariak gaineratu du gaitzak “arazo bat” izaten jarraitzen duela. ©Gorka Rubio / FOKU

Bengoak uste du egoera «larria» dela

Aloña Beraza Peña

Ikuskaritza independente bat eskatu dute gertatu dena ikertzeko, egin diren hutsegiteak berriz ere egin ez daitezen, eta aurrera begira ikasteko.

PCR proba egiten gaur, Donostiako Okendo kultur etxean. ©Gorka Rubio/FOKU

Gasteizko Kilimanjaro diskotekan eta Xixilu jatetxean, eta Galdakaoko Muguru tabernan egon zirenei proba egiteko eskatu die Jaurlaritzak

Berria

Gasteizko diskotekan uztailaren 17tik abuztuaren 6ra izan zirenek egin beharko dute testa, eta uztailaren 31tik abuztuaren 4ra jatetxean egondakoek. Galdakaon, tabernan uztailaren 27tik abuztuaren 4ra egon zirenek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna