Literatura

Feminismoa jarriko du erdigunean Literaktumek

Azaroaren 11tik 24ra izango da aurtengo jaialdia. Feminismoaz, identitateaz eta arte sorkuntzaz duten ikuspegia emango dute hainbat emakume idazlek.

Literaktum jaialdiaren aurkezpena, gaur.
Literaktum jaialdiaren aurkezpena, gaur. BERRIA

Erredakzioa -

2019ko azaroak 5

"Gaur egun eztabaida publikoaren erdigunean diren auzi ugari eta larrien artean, beharbada ez da izango borroka feminista baino sakonera eta indar handiagokorik", adierazi dute antolatzaileek. Eta literatura "borroka horren funtsezko motorretako" bat dela iritzita,  literaturaren eta feminismoaren arteko loturak jarriko ditu erdigunean 2019ko Literaktumek. Ardatz nagusia feminismoa izango den arren, beste eztabaida batzuei ere egingo die tokia, hala nola poesiaren eta pentsamenduaren arteko loturari, Europaren kultura, hizkuntza eta literatura aniztasunari eta identitate nozioari buruzko eztabaidari.

Literatura beste diziplina batzuekin eta eztabaidarik gaurkoenekin batera hurbiltzeko asmoz sortu zuten jaialdia, eta datorren astelehenean hasiko da aurtengoa. 50 gonbidatu baino gehiago izango dira Donostian, tartean emakume idazle hauek: Elvira Sastre, Maria Sanchez, Espido Freire, Laura Freixas, Mariasun Landa, Christina Rosenvinge, Paula Bonet, Eider Rodriguez, Kattalin Miner, Lucia Baskaran, Luisa Etxenike, Marta Sanz eta Cristina Morales. Bakoitzak bere ikuspegia azalduko du identitateaz, feminismoaz eta arte sorkuntzaz.

Aurkezpenena izaten da Literaktumeko ataletako bat, eta Bernardo Atxagak (Etxeak eta hilobiak), Ibon Martinek (La danza de los tulipanes) eta Karmele Jaiok (Aitaren etxea) beren azken eleberriak aurkeztuko dituzte. Adam Zagajewski 2017an Princesa de Asturias saria jaso zuen idazlea ere Donostian izango da, El Fulgor de la poesia liburua aurkezteko.

Urtemuga gogoratzeko jarduerak

Protagonismo berezia izango du euskal idazle batek: Ramon Saizarbitoriak. Mende erdia bete da Egunero hasten delako argitaratu zuenetik, eta zenbait jardueraren bidez oroituko du urtemuga Literaktumek. Batetik, Ibilbide literarioa: Saizarbitoriaren Donostian barna izeneko egitasmoa antolatu du, Inazio Mujikaren gidaritzapean; bestetik, Iratxe Retolazak, Lurdes Oñederrak eta Itxaro Bordak Egunero hasten delako gaur egundik mahai inguruan parte hartuko dute. Lur, kultura herriarentzat Lur argitaletxeari buruzko erakusketa ere jarriko dute Ernest Lluch kultur etxean. Saizarbitoriaz gain, Joxean Artze ere —iaz hil zen— omenduko du Literaktumek, haren poesia eta musika ibilbidea berrikusiz.

Diziplinarteko proposamenei dagokienez, Teatro del Temple eta Tanttaka Teatroaren arteko Abre la puerta eta Harkaitz Cano, Maite Larburu eta Ion Olanoren Bestaldearen bestaldean dira aurtengo proposamenetako batzuk. Book Friday da beste berrikuntzetako bat, liburuzale eta literaturazale izateko grina pizteko egitasmo bat. Zenbait ekintza izango dira jaialdian parte hartuko duten hamahiru liburu dendetan, baina antolatzaileek aurrerago emango dituzte horiei buruzko xehetasunak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna