Gasteizko Lan Arloko Epaitegiak Mercadona banaketa konpainia zigortu du sindikatuen aurkako jarduna izan duelakoan. Juan Roigen enpresak 3.550 euro ordaindu behar dizkio ELA sindikatuko ordezkari bati osagarri bat ez ordaintzeagatik, eta baita enpresako zuzendaritzaren politika antisindikalak eragindako kalte galerengatik ere.
ELAren arabera, azken urteetan langileei soldata onak pagatzen dizkiela zabaldu duen konpainiaren politika antisindikala «onartezina da»; «ez dira errespetatzen langileen ordezkarien oinarrizko eskubideak, enpresaren erabakien gainetik langileen interes kolektiboak zaindu ahal izateko», esan du sindikatuak, ohar batean. Epaia azaroaren 13koa da.
Dena den, gertaturikoak badu azalpen sakonagoa, ELAren ustez. «Ez da kasu bakana izan Mercadonan, zeren enpresako zuzendaritzak lan baldintzak indarrez ezarri nahi baititu, langileen ordezkariak eta langileak berak beldurtuz», esplikatu du, eta ohartarazi ELA ez dagoela prest hori onartzeko. «Sindikatuak eskura dituen neurri guztiak hartuko ditu horrelako ekintza antisindikalak desagerrarazteko; ekintza horien azken helburua langileen baldintzak hobetzeko eskaerak oztopatzea baita».
