Gizartea

Haur eta adingabeen aurkako sexu abusuak detektatzeko tresna bat sortu dute

Bost haurretik batek pairatzen ditu sexu abusuak, EDE fundazioak egindako txosten batek dioenez. Sexu abusuen susmoa duten profesionalei orientazioa emateko webgune berri bat martxan jarri dute.

Txostenaren aurkezpena, gaur, Eusko Jaurlaritzako Lakuako egoitzan.
Txostenaren aurkezpena, gaur, Eusko Jaurlaritzako Lakuako egoitzan. Irekia

Edurne Begiristain -

2019ko abenduak 2

Haur eta nerabeen aurkako indarkeriak ertz asko ditu, eta hura detektatzea «oso konplexua» da. Hala ondorioztatu du Eusko Jaurlaritzak eskatuta EDE fundazioak egindako txosten batek. Azterlanak abusuak hobeto ulertzeko gakoak bildu ditu, eta baita horiek aurreikusteko eta detektatzeko neurriak ere.  Gaur goizean aurkeztu dute txostena  Lide Amilibia Eusko Jaurlaritzako Gizarte Politiketarako sailburuordeak, Ainara Canto EDE fundazioko ikerketa arduradunak eta Rosa Lizarraga Agintzari kooperatibako psikologoak. Lakuako egoitzan (Gasteiz) egin dute aurkezpena.

Indarkeria mota guztien artean, haur eta adingabeen aurkako sexu abusuak izaten dira detektatzeko zailenak. Salatzen diren abusuen artean %2 bakarrik dira sexu abusuak. Sexu abusu horiek, baina, oso denbora gutxian, «tabu izateari» utzi, eta prebentzio eta lehentasunezko jarduera esparru bihurtu dira erakunde publikoentzat eta osasun, justizia eta hezkuntza alorretan lan egiten dutenentzat. Hala azaldu du Rosa Lizarragak, haurren aurkako sexu abusuen balorazio, orientazio eta arretan diharduen Agintzari kooperatibako kideak. Haurren aurkako abusu sexualak detektatzea da eremu ezberdinetako profesionalek izaten duten arazo nagusia, eta webgune bat sortu dute kezka horri erantzuna emateko: screening.agintzari.com

Screening moduan diseinatu dute, profesionalak orienta daitezen sexu abusuen susmoak dituztenean. Horretarako, sexu abusuak detektatzeko 50 adierazle aukeratu dituzte. Webgunea «abusuen susmo oinarritu bat ezartzeko diseinatuta dago, ez abusua gertatu den ebazteko», Lizarragak azaldu duenez. Edozein herritarrek erabili dezake tresna hori, baina bereziki profesionalentzat egina da.

Txostena

Bestalde, haur eta nerabeen aurkako indarkeria aztertzeko txostenaren berri eman dute. Indarkeria mota ezberdinak aztertu dituzte bertan; besteak beste, familia barruan gertatzen den indarkeria, erakundeek eta hedabideek bultzatzen dutena eta sexu abusuak. Txostenak dioenez, bost herritarretik batek sexu abusuak pairatu ditu haurtzaroan, eta indarkeria kasuen %10 baino gutxiago salatzen dira haurtzaroan edo nerabezaroan, hau da, indarkeria pairatzen den unean. Batez beste, indarkeria abusuen kasuak epaitu arte hiru urte baino gehiago igarotzen dira, eta abusuak jasan dituzten haurrek lau aldiz kontatu behar izaten dituzte pairatu dituzten abusuak, azterlanaren arabera.

«Haurren aurkako biolentzia saihestu daiteke», azpimarratu du Cantok. Horretarako, ikuspegi integrala duen «prebentzio estrategia» bat garatzea proposatu du. Txostenak hainbat lehentasun jaso ditu; tartean, honako hauek: prozesuak eta erantzunak azkartzea, arreta zerbitzua kontrolatzea, haurrei eta nerabeei gehiago entzutea eta emozioan oinarritutako hezkuntza afektibo-sexuala indartzea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna