Petrolioa

Saudi Arabiak petrolio ekoizpena txikitu nahi du, prezioak igotzeko

Lurralde Petrolio Esportatzaileen Erakundeak bilera du gaur arratsaldean Vienan.

Abdulaziz bin Salman Al Saud, Saudi Arabiako Energia ministroa, gaur, Vienan.
Abdulaziz bin Salman Al Saud, Saudi Arabiako Energia ministroa, gaur, Vienan. CHRISTIAN BRUNA / EFE

Iker Aranburu -

2019ko abenduak 5

LPEEk 2016ko azaroan erabaki zuen petrolio ekoizpena 1,2 milioi upel txikitzea, prezioen beherakada eteteko. Orduz gero egin dituen bilera guztietan luzatu egin dute murrizketa, baina kopurua aldatu gabe. Estrategia horrek erdipurdiko emaitza izan du: Brent upela ez da orduan bezala 40 dolarretan salerosten, baina ez du lortzen kartelak nahi duen prezioan egonkortzerik; hau da, 70 dolarretik gora. Azken bi egunotan 61 dolarretik 63ra igo da prezioa, LPEEren bilerak hauspotuta.

Saudi Arabiak gidatzen du ekoizpena are gehiago murriztea proposatzen duen taldea. Beste 400.000 upel kendu nahi ditu merkatutik. Gainera, murrizketaren epea luzatu nahi du, 2020 osoa hartzeraino. 

Adituen arabera, prezioen gorakada handia lortzea baino, prezioen jaitsiera eragoztea da Saudi Arabiaren helburua. Izan ere, aurreikuspenek diote 2020 hasieran eskaintzak aise gaindituko duela eskaera. Hori gertatzen da munduko ekonomiaren moteltzeak kontsumoa txikitzen duelako, baina baita AEBak inoiz baino petrolio gehiago ekoizten ari direlako ere. Fracking edo haustura hidraulikoaren bitartez egiten dute, eta sistema horrekin produkzioa ezin da aldi baterako eten.

Saudi Arabiak eta haren aliatuek LPEEren babesa lortuz gero, bigarren hesi bat gainditu beharko dute: Errusiarena eta karteletik kanpo dauden beste ekoizle batzuena. Azken urteetan talde horrekin koordinatu du bere politika LPEEk, baina badirudi oraingoan zailagoa izan daitekeela, Errusiak ekoizpena berreskuratu nahi duelako.

 

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna