Albistea entzun

Soslaia

Borja Senper: PPkoa, baina ildo propioarekin

PPren barruan ahots propioa izan du Borja Senperrek, eta kritikoa izan da alderdiaren norabide politikoarekin.

Borja Semper, Donostiako Udalerako hauteskunde kanpainan.
Borja Semper, Donostiako Udalerako hauteskunde kanpainan. Javier Etxezarreta / EFE Tamaina handiagoan ikusi

Edurne Begiristain -

2020ko urtarrilak 14 15:02

PPren barruan profil propioa izaten saiatu da. Ahots propioa. Eta lortu du. PPk azken boladan hartutako norabide politikoarekin deseroso sentitu da Borja Senper (Irun, Gipuzkoa, 1976), eta ez ditu ezkutatu ildo ofizialarekin zituen desadostasunak. Areago, maiz azaldu ditu publikoki. PPren barruan bertso aske bat izan dela diote askok, Genovatik finkatutako norabide politikoarekin itsu-itsuan bat egin ez duen politikaria. Eta, egia da, neurri batean. Senperrek ahoan bilorik gabe eman duela bere iritzia gustuko ez zituen alderdiaren erabaki eta adierazpenen inguruan. Besteak beste, iraganean modu argian kritikatu izan ditu bere alderdiak onartutako abortuaren erreforma edo sexu bereko pertsonen ezkontza legearen aurka jarritako helegitea.

Bere burua «liberal» gisa definitu izan du Senperrek, «baita poltsikotik gora ere». 11 urtez aritu zen Irunen zinegotzi, eta PSOErekin egindako gobernu akordioen ondorioz, alkateorde izan zen birritan. 2010ean, Irungo zinegotzi postua utzi zuen, eta, ordutik, Eusko Legebiltzarrean eta alderdi barnean aritu da lanean. Joan den urteko apirilaren 28ko Espainiako Kongresuko bozetarako hautagai nahi zuten batzuek, baina berak lehenetsi egin zuen Donostiako Udaleko alkate izateko lehian aritzea. Aitortu zuen «politika nazionalarekin nekatuta» zegoela, eta nahiago zuela Donostiari begira jarri. Baina Espainiako politikagintzaren inguruko jarrera kritikoa zuela ez zuen ezkutatu, eta agerian da ikuspegi kritiko horrek pisu handia izan duela politika uzteko erabakian.

2018ko ekainean, PPk barne prozesu bat abiatu zuen alderdiko presidente berria hautatzeko. Senper Soraya Saez de Santamariaren hautagaitzaren alde agertu zen, baina Pablo Casadok irabazi zuen eta alderdi barneko postuetatik at geratu zen. PPren zuzendaritzaren eta EAEko popularren artean lehendik ahulak ziren harremanak are ahulagoak dira Casado Genovan dagoenetik, eta, Alfonso Alonsorekin batera, EAEko PPren norabide propioa finkatzen saiatu diren horietako bat izan da Senper. Kostata, baina. Ezagunak dira Senperrek alderdiko zuzendaritzarekin izandako desadostasunak, horietako asko biziak eta polemikoak. Gatazka horietako azkenetarikoa Cayetana Alvarez de Toledo PPk Espainiako Kongresuan duen bozeramailearekin izan zuen. Alvarez de Toledo bozeramaileak gogor jo zuen Alfonso Alonsoren alderdiaren aurka, eta, besteak beste, kritikatu zuen Arabako, Bizkaiko eta Gipuzkoako PPk «epelkeriaz» jokatu izana abertzaleekin, hauteskunde etekinak lortzeko. Alvarez de Toledori oso gogor erantzun zion orduan Senperrek: «Guk odolez eta malkoz ordaindu dugu konstituzioa eta Espainiaren ideia Euskal Herrian defendatu izana; batzuk moketa erosoen gainean ibiltzen ziren bitartean, guk bizitza jokatzen genuen hemen elkarbizitza defendatzen».

PPk azken urteetan izandako boto galera etengabea dela eta, alderdiaren autokritika faltarekin suminduta agertu izan da Senper. Espainiako Gorteetarako bozetan, esaterako, PPk emaitza kaskarrak eskuratu zituen: diputatuen erdiak galdu zituen, eta bi ordezkari baino ez zituen lortu Euskal Herrian. Hori ikusirik, Senperrek alderdiari eskatu zion «gogoeta sakona» egiteko, iritzita «soilik zentraltasunetik eta moderaziotik» izango dela PP alderdi «baliagarria».

Hain justu, Voxek Espainiako politikagintzara jauzi egin zuenetik, are gehiago handitu zen Senperren eta PPren zuzendaritzaren arteko distantzia. PPren eta Voxen arteko elkar ulertzetik aldentzen saiatu izan zen, maiz, eta nabarmendu zuen bi alderdion proiektu politikoen arteko aldea «ozeano baten tamainakoa» zela. Errealitatea, baina, oso bestelakoa izan da, eskuin muturreko alderdiak PPren diskurtsoa eta norabidea kutsatu egin baititu. Horretaz jabetu eta kezka azaldu izan du Senperrek publikoki. Hala azaldu zuen, El País egunkariari emandako elkarrizketan: «Nik ez dut politika ulertzen lubaki gisa, ausardiaren eta koldarkeriaren arteko borroka gisa, elkar ulertzeko eta ezberdinen arteko zubiak eraikitzeko modu gisa baizik».

Sarritan esan du PPk ez lukeela hurbildu behar Voxera, eta kezkatuta agertu da eskuin muturreko diskurtsora gerturatzen ari zelako bere alderdia. Joan den urteko martxoan Berria egunkariari emandako elkarrizketa batean ere azaldu zuen kezka hori: «Badirudi tonua igo nahi dela, hala dagoelako giroa, baina PPren proposamenak ezagunak dira, eta ez dago aldaketarik...». Hala ere, iradoki zuen PPk Voxen posizioetara hurbilduz gero, berak ez lukeela lekurik izango politikagintzan, eta utzi egingo zuela. Ia urtebete geroago, hitza bete du.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

11 ekintzaileak, Baionako auzitegi aitzinean ©Guillaume Fauveau

Martxoaren 9an emango dute 11 'bakegileren' aurkako deliberoa

Ekhi Erremundegi Beloki

Hamar auzipeturentzat 950 euroko isuna eskatu du fiskalak, gibelapenarekin. Uztailaren 23ko protestetan errepidea blokeatzea egotzita epaitu dituzte.

Iratxe Sorzabalen zauriak, 2001eko atxiloaldiaren ostean. ©Berria

Iratxe Sorzabalen kontrako zigorra berretsi du Auzitegi Gorenak, torturak ukatuta

Berria

Euskal preso horrek pairatutako torturen berri eman izanak ez du «egiaztatzen» halakorik sufritu zuenik, Gorenaren arabera.

Beatriz Artolazabal Eusko Jaurlaritzako Berdintasun, Justizia eta Gizarte Politiketako sailburua, iazko azaroan, Eusko Legebiltzarrean. ©JAIZKI FONTANEDA / FOKU

Artolazabalek otsailaren 14an utziko du sailburu postua

Mikel Elkoroberezibar Beloki

EAJren Gasteizko alkategaia izango da Artolazabal, eta kanpainaurreari heltzeko utziko du Berdintasun, Justizia eta Gizarte Politiketako sailburu postua. Esan duenez, «oso gustuko» izango luke bere ordezkoa emakume arabar bat izatea.

GKSko kide baten atxiloketa salatzeko mobilizazioa, iazko ekainean ©Bob Edme

GKSko kide bat epaituko dute Pauen

Ekhi Erremundegi Beloki

Asteartean eginen diote epaiketa, Paueko Dei Auzitegian. Margoketak egitea leporatzen diote.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...