Gizartea

Gipuzkoako zahar etxeetako greba beste hilabetez luzatuko du ELAk

Patronalaren jarrera «prepotentziaz» beteta dagoela iritzita, sektoreko langileen egoera hobetzeko «beste biderik» ez dagoela esan du

Gipuzkoako zahar etxeetako greba beste hilabetez luzatuko du ELAk
Gipuzkoako zahar etxeetako greba beste hilabetez luzatuko du ELAk Tamaina handiagoan ikusi

Arantxa Iraola -

2020ko otsailak 7

ELA sindikatuak deituta, agerraldia egin dute gaur Gipuzkoako Foru Aldundiaren aurrean herrialdeko zahar etxeetako langile ugarik, eta agerian utzi dute greban jarraitzeko asmoa. Gaur amaitu dute hilabete osoko greba bat, eta beste hilabetean behintzat segitzeko asmoa agertu dute: martxoaren 8ra arte. «Mingostasunez eta haserre» eman dute mezua; izan ere, 2018ko irailetik ari dira herrialdeko lan itun baten alde egiteko mobilizazioetan, eta dagoeneko 207 egun daramatzate greban. ELAk du gehiengoa sektorean, baina ez da grebak egin dituen bakarra: LAB sindikatuak deituta ere hainbat mobilizazio eta greba egin dira.

«Argi eduki dezatela ez garela geldituko», adierazi dute langileek. Gatazka hasi zenetik patronalak langileekiko «prepotentziaz» jokatu duela argudiatu dute, eta Gipuzkoako Foru Aldundiak ere ez diela inolako babesik erakutsi. Erakunde horrexen aurrean egin dute agerraldia, hain justu, auzian duen erantzukizuna gogora ekartzeko; izan ere, zahar etxeetako toki gehienak erakunde horrek itundutakoak dira, eta neurriak eskatzen ari zaizkio langileak. Gaur ere egin diote galdera: «Gipuzkoako Foru Aldundiak ez al du ezer esateko eta egiteko ere? Jarraituko al du estaldura ematen jarduteko modu horri?».

Ez da ezustekoa izan gaurko deialdia. Urtarrilaren 23an egin zuten azken bilera sindikatuek eta patronalak, eta langileen ordezkariek argi utzi zuten orduan gatazka gordintzeko arriskua zegoela. Patronalaren proposamen bat jasotzeko esperantzarekin joan zirela adierazi zuten, baina «onartezina» izan zela enpresetako ordezkariek erakutsitako jarrera: salatu zuten patronalak ez zituela kontuan hartu nahi langileen eskerik oinarrizkoenak ere. Hain justu, proposamenean 2019-2022 urteak hartzen ziren aintzat: 2017. eta 2018. urteak galduta daude. Sindikatuek usu utzi dute agerian ez daudela prest «marra gorri» hori onartzeko, eta, horregatik, adierazi zuten kalean jarraitu beharko zutela: «Greba gehiago izango dira: seguru. Eta egoera ikusita, gainera, luzerako izango da». Gaur mezu hori bera berretsi dute: «Ez dago beste biderik».

Gatazka hasi zenetik, langileen lan baldintzak hobetzeko neurri bakar bat egon da, baina herabea izan zen, eta herrena: iazko azaroaren 8an UGTk soldaten gaineko itun bat hitzartu zuen enpresekin, baina langileen ordezkaritzaren %10 besterik ez du sindikatu horrek sektorean, eta beste sindikatuek ez zuten ontzat jo. ELAko ordezkariek gaurko agerraldian adierazi dutenez, hainbat enpresak «akordio miserable» hori ere ez ezartzea erabaki dute, eta patronalaren jarrera agerian uzten du horrek.

Horiek horrela, hilaren 12rako deituta dagoen negoziazio mahaira ez direla joango esan dute ELAko ordezkariek. Langileen oinarrizko eskabideak aintzat hartzen ez dituen proposamen «serio» bat mahai gainean jartzen ez den bitartean bilerak «antzerki» hutsa izango direla adierazi dute, eta ezin dela horietan parte hartu. 

 

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Durango, atzo arratsaldean. Dena itxi behar dute 21:00etatik aurrera. ©Aritz Loiola / FOKU

Alarma egoera ezartzea erabakiko du gaur Espainiako Gobernuak

Edu Lartzanguren

Ministroen Kontseilu berezia egingo dute gaur dekretua sinatzeko, besteak beste Hego Euskal Herriko gobernuburuek eskatuta.

 ©JON URBE / FOKU

«Onartezina da bihar txertoa heltzea eta horretaz gogoetarik egin gabe egotea»

Arantxa Iraola

Txertoa lortzeko ikerketek, hura jartzeko garaia heltzen denerako ezarri behar diren irizpideek, itaun etiko ugari ekarri dituzte. Horietaz gogoetan ari da Ausin, eta, oro har, izurriaren inguruko auzi etikoez. Hitz hau darabil usuenik: «Gardentasuna».

Jaten emateko lizentziarik ez duten ostatuetako bat, Maulen, estadioaren parean, halabeharrez hetsirik. ©GUILLAUME FAUVEAU

Etxeratze aginduak ez du karismarik

Ainize Madariaga

COVID-19ren kontrako manuek ezinegona eragin dute hainbat herritarren artean. Hiru ostatuk ezin dute ireki Maulen. Zabal dezaketenek ez dakite norat buruz doazen

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna