Osalanek enpresen esku utzi du amiantoarekin kontaktuan egon zirenei azterketak egitea
Ez da derrigorrezkoa izango osasun azterketa zehatzak egitea. Osalanek nabarmendu du ez dagokiela beraiei azterketa horiek egitea, eta enpresetako prebentzio zerbitzuei gomendioak ematera mugatu direla.
«Guk ezin ditugu derrigortu, enpresa bakoitzak bere erabakiak hartu behar ditu, eta guk informazioa eman diegu». Osalanek hori esan du amiantoarekin kontaktuan egon zirenen osasun azterketa zehatzei buruz; hau da, Osalanen hitzetan, ez dagokie eurei azterketa medikoak egitea Zaldibarko (Bizkaia) luizian babesik gabe amiantoarekin kontaktuan egon ziren langileei. Kontrol hori enpresa bakoitzaren prebentzio zerbitzuen esku egongo da, eta ez da derrigorrezkoa izango. Osalanek azaldu duenez, enpresa bakoitzak –Ertzaintzak, suhiltzaileek, foru aldundiek, Eusko Jaurlaritzak, Moyua eraikuntzak...– bere prebentzio zerbitzua dauka, propioa zein kanpokoa. «Haiek erabaki behar dute; informazioa eman diegu prebentzioko zerbitzu guztiei, eta kito».
Osalanek esan du lehen zazpi edo zortzi orduetan langileak babes neurririk hartu gabe aritu zirela, baina arriskua «oso-oso txikia» dela. Nabarmendu du prebentzio zerbitzuei langileen zerrenda pasatu dietela, esanez langile bakoitza non egon zen eta zer egin zuen lehen orduetan. «Kanpoan edo urrun egon zirenak beste zerrenda batean jarri genituen», azaldu du.
Luiziak harrapatuta jarraitzen duten bi langileak aurkitzeko lanak eten behar izan zituzten, amiantoa agertu zelako. Ordu batzuetan, ordea, babes neurririk hartu gabe aritu ziren erreskate lanetan. Lehen egunean Zaldibarko luizian lanean aritu zen suhiltzaile batek informazio falta salatu zuen BERRIAn. Ziurtatu zuenez, ez zekiten zabortegi bat amildu zenik, ezta amiantoa edo beste gai toxikorik egon zitekeenik ere.
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
